Алатай гьафтеда “Лезги газетдин” кьилин редактор Мегьамед Ибрагьимовни адан заместитель Куругъли Ферзалиев хейлин йисара газетдин редакцияда медениятдин отделдиз регьбервал гайи публицист, писатель Казим Казимоваз мугьман хьана.
Казим Мегьамедшерифовича алатай йисуз 85 йисан юбилей къейдна. Адакай саки 65 йис ада хайи чIал хуьнин рекьиз бахшна. Мегер им чIехи ватанпересвал тушни! И рекье ам вилерин ишигъдикайни магьрум хьана. Амма руьгьдиз мягькем, гьакьван лезги чIалаз вафалу Казим Казимова, пенсияда аватIани, кьвед лагьай кIвализ элкъвенвай “Лезги газетдин” редакциядихъ галаз алакъаяр атIанвач: мукьвал-мукьвал зенгер ийизва, бязи крара меслятар къалурзава, ара-ара макъалаяр, гьикаяяр рекье твазва.
Казим Казимова, лезги публицистикада хьиз, милли эдебиятдани кьетIен гел тунва. Фикирдиз адан къелемдикай хкатнавай цIудралди гьикаяяр, шиирар, “Имамали-бег” роман, “Дидедин намус” драма къвезва. Алай йисан эвел кьилера Дагъустандин ктабрин чапханада Казим Казимован “Аллагьдин суд” тIвар алай цIийи ктаб акъатна.
Мугьманвиле авай вахтунда Мегьамед Ибрагьимова милли публицистикадин вилик лайихлувилерай, хейлин йисара редакцияда намуслувилелди зегьмет чIугунай Казим Казимовав “Лезги газетдин” — 100 йис” медаль вахкана, адахъ чандин сагъвални яргъи уьмуьр хьун алхишна.
Кьил чIугунай, вичин зегьметдиз къимет гунай Казим Казимова “Лезги газетдин” редакциядин вири коллективдиз сагърай лагьана ва газетдин дережа мадни виниз акъатун вичин эрзиман мурад тирди къейдна.
Агьмед Магьмудов
