Дагъустанда кьакьан мертебайрин 154 кIвал къанунрал амал тавуна эцигнавай кIвалерин сиягьдай акъуднава
8-августдиз Махачкъалада Сергей Меликован регьбервилик кваз РД-дин Гьукуматдин комиссиядин заседание кьиле фена. “Лезги газетдиз” Дагъустандин Кьилин пресс-къуллугъди хабар гайивал, заседанидал веревирд авур асул месэла къанунрал амал тавуна эцигнавай кьакьан мертебайрин кIвалерихъ галаз алакъалуди тир.
Сергей Меликова вичин рахунра къейд авурвал, къанунрал амал тавуна эцигнавай кIвалериз, абур вири патарихъай ахтармишна, официальный документар гун (легализация) кар алай месэлайрикай сад я. Амма ихьтин документар, региондин Кьилин фикирдалди, агьалийрин уьмуьр ва сагъламвал патал хаталувал авачир кIвалериз гана кIанда.
“И кардихъ галаз санал гележегда ихьтин эцигунрин вилик пад кьадай серенжемарни кьабулун герек я. КIвалер хкажзавай карханайри эцигунрин хилез талукь вири къанунрал амал авун шартI я…”, — лагьана С.Меликова.
РД-дин эцигунрин, архитектурадин ва ЖКХ-дин министрдин везифаяр вахтуналди тамамарзавай Александр Нестерован гафарай малум хьайивал, Дагъустанда, санлай къачурла, къанунрал амал тавуна эцигнавай кIвалерин кьадар 457-дав агакьнава. Абурукай 154 кIвализ суддин къарарралди официальный документар туькIуьрнава.
РД-дин Гьукуматдин Председателдин сад лагьай заместитель Манвел Мажонца къейд авурвал, алай вацран эхирралди кьакьан мертебайрин мад 25 кIвализ официальный документар туькIуьрна акьалтIарда.
Лагьана кIанда, республикадин эцигунрин, архитектурадин ва ЖКХ-дин министерстводи къанунрал амал тавуна эцигзавай кIвалерин реестр кардик кутунва. И сиягьда гьатнавай кIвалерни пуд патал пайнава. Сад лагьай паюник суддин къарарралди официальный документар ганвайбур акатзава. Кьвед лагьайдак алай вахтунда инсанар яшамиш жезвай ва агьалийрин уьмуьрни сагъламвал патал хаталувал авачир кIвалер кутунва. Амма кIвалер эцигнавай чилин мулкариз талукь документар къайдадик квач. Пуд лагьай паюник акатнавай кIвалер я михьиз чукIурда, я абур эцигун давамар хъийида.
Чи мухбир
