Махсус серенжемдикай
“Новости” РИА-ди хабар гузвайвал, Украинадин кьушунри эхиримжи суткада ДНР-дин мулкарихъ 81 сеферда цIай ахъайна. Нетижада Донецкдин, Макеевкадин, Горловкадин ва маса са шумуд райондин 45 кIвализ-дараматдиз зарар хьана.
Украинадин президент В.Зеленскийди РагъакIидай патан уьлквейрин гьукумдарривай россиявияр патал са йисан муддатда часпарар агалун истемишзава. Адан фикирдалди, “ибур виридалайни важиблу санкцияр я”. Идакай “Sputnik” радиоди хабар гана.
Гьа са вахтунда РагъакIидай пата Украина яракьралди ацIурунин гьерекатар давамарзава. “Известия” чешмедин делилралди, Евросоюзди вад вацран муддатда Украинадиз 8,9 миллиард евро чара авуна. И такьатрин пудай са пай военный рекьяй куьмек гуниз серфна.
США-дин президент Байдена Киевдиз военный куьмек гун патал цIуд миллиардралди долларар чара авунин гьакъиндай къарардал къул чIугуна.
Россиядин МИД-дин кьил С.Лаврова къейд авурвал, Украинадин терефди сифтедай хьайи рахунар, чпин теклифар гуьгъуьнлай чпи гьисаба хкьунач. Меслят жедай рахунар давам тахьун патал арада футфа твазва. РагъакIидай патан таъсирдик квай Киевдихъ галаз рахунар давамар хъувунихъ, министрдин фикирдалди, са метлебни амукьзавач. Амма Россияди рахунар кьиле тухунин мумкинвиликай садрани кьил къакъудзавач.
9-августдиз РФ-дин оборонадин министерстводи малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 264 самолет ва 145 вертолет, зенитный ракетайрин 363 комплекс, пилот галачиз лув гудай 1711 аппарат, 4278 танк ва дяведин маса машинар, РСЗО-дин 794 машин, артиллериядин ва маса 3284 яракь, военный махсус 4785 автомашин тергна.
Референдум кьиле тухуда
Запорожьедин гьукумдарри область Россиядик экечIунин гьакъиндай референдум кьиле тухуниз талукь къарар акъуднава. Идакай “Новости” РИА-ди хабар гузва.
Запорожьедин областдин кьил Е.Балицкийдин фикирдалди, агьалийрин арада референдум сентябрдиз кьиле тухудай фикир ава.
Чешмеди алава хъийизвайвал, Запорожьедин са пай, гьа жергедай яз Мелитополь ва Энергодар, гьакIни Херсондин область Россиядин къуватри гуьзчивилик кутунва. И чкайра цIийи администрацияр кардик акатнава, Россиядин телеканалар, радиояр рахазва ва Крымдихъ галаз алишверишдин алакъаяр гуьнгуьна хутазва.
Газ багьа хьанва
Голландиядин энергопорталдин делилралди, Европада виридалайни гзаф Швециядани Нидерландра газдин къимет багьа я.
“Лента.ру” чешмеди хабар гузвайвал, аналитикри Европадин 33 уьлкведа газдин къиметар ахтармишна. Маса уьлквейрив гекъигайла, Нидерландра къимет кьве сеферда багьа я. Къейдзавайвал, эхиримжи са шумуд йикъан къене Европада газдин къимет 12 процентдин хкаж хьанва.
Коронавирусдикай
Россияда медицинадин маскаяр маса гунин кар, июндив гекъигайла, июлдиз 17 процентдин артух хьана. Идакай “Известия” чешмеди хабар гана.
Россиядин махсус лабораторийра ахтармишзавай тестери къалурзавайвал, коронавирус квайбурун кьадарни эхиримжи йикъара кьве сеферда артух хьанва.
9-августдин делилралди, эхиримжи суткада Россияда коронавирус акатай 16325 кас дуьздал акъудна, абурукай 2574 — азарханайра къаткурна. Эхиримжи юкъуз вирусдик 60 кас кьена, 13092 — сагъ хъхьана.
Идалай вилик малумарайвал, уьлкведин Рособрнадзорди ковид себеб яз мад сергьятвилер кардик кухтуниз эвер гузвач. ТIугъвалдин гьалдиз килигна, алай вахтунда са гьихьтин ятIани къадагъаяр кардик кутунин гереквал авач.
ЦIайлапанди кьена
И йикъара Индиядин Бихар штатда са йикъан муддатда цIайлапан себеб яз, 20 кас кьена. Идакай “The Times of India” чешмеди хабар гана.
Штатдин гьукумдарри гьаваяр чIур жедайдакай виликамаз хабар гузватIани, цIайлапанар галаз тIурфанар къвазвай вахтунда кIвалерай экъечI тавунин патахъай тагькимарзаватIани, вири агьалийри эвер гуниз герек тирвал фикир гузвач. Нетижада абур цIайлапандин къурбандриз элкъвезва.
Менфятлу суьрсетар
Духтур-пегьризчи, профессор М.Королевади къейдзавайвал, сагълам тушир тIуьни ва ички квай хъвадай затIари гьакъикъи азарар арадал гъунин хаталувал ава. Ихьтин затIарин зарардин вилик пад кьун патал ада салан бязи майваяр тIуьн теклифзава. Адан фикир “Sputnik” радиоди раижна.
Кьилди къачуртIа, беден зегьерлу шейэрикай михьи авун патал брокколи, успагьан (шпинат), рангунин ва адетдин келемар тIуьн хийирлу яз гьисабзава.
«Лезги газет»
