8-августдиз Дагъустан Республикадин Кьил Сергей Меликован регьбервилик кваз Дагъустанда, къецепатан гьаларни фикирда кьуна, экономика дурумлувилелди вилик фин таъминарунин рекьяй Оперативный штабдин заседание кьиле фена. Идан гьакъиндай “Лезги газетдиз” РД-дин Кьилин пресс-къуллугъди хабар гана.

Мярекат ачухуналди, региондин Кьили алай вахтунда зулунни хъуьтIуьн варцариз гьазур хьунин кар алай месэла къарагъарна. “Чимивилинни энергетикадин комплексдин хиле гьалар пайгардик кутун тавунмаз, чи экономика дурумлувилелди вилик тухуз жедач”, — лагьана Сер­гей­ Меликова. И кар патал ада зулунни хъуь­тIуьн варцариз хъсандиз гьазур хьун патал ва экономика дурумлувилелди вилик тухуниз куьмек гунин мураддалди оперативный штабриз чпин къуватар сад авуна кIанзавайдакай малумарна.

РД-дин Гьукуматдин Председателдин Сад лагьай заместитель Руслан Алиева къецепатан гьалари таъсирзавай шартIара Дагъустан Республикадин экономика дурумлувилелди вилик тухун патал кьабулзавай серенжемрикай лагьана. Регионрин экономикадиз куьмек гун патал Россиядин Гьукуматди туькIуьр­на­вай са жерге се­рен­жемрикай лугьуналди, Р.Алиева къейд­на хьи, шегьердин къу­­лай шартIар арадал гъунин Вирироссиядин конкурсдин гъалибчийрин проектар кьилиз акъудун патал 3,6 миллиард манат чара ийидайвал я. ИкI, республикадин шегьерра ва районра аваданламишуниз талукь проектар уьмуьрдиз кечирмишун патал Да­гъустан­диз 30,6 миллион манат ахъайнава.

Руслан Алиева лагьайвал, яшайишдин метлеб авай дараматар эцигзавайбу­руз чилин участокар чара авунин кIва­лах­ни авайдалай кьезиларнава.

Зулунни хъуьтIуьн варцара электроэнергетикадин ва газдин имаратар хъуь­тIуьз гьазурунин гьалдикай “Россети Северный Кавказ” ПАО-дин генеральный ди­ректордин заместитель — кьилин инженер Виктор Абаимова суьгьбетна.

РД-дин Гьукуматдин Председателдин Сад лагьай заместитель Манвел Мажонца баян гайивал, алай йисуз зулунни хъуь­тIуьн варцариз гьазур хьуниз талукьарнавай программада къалурнавай кIвала­хар йигин еришралди кьиле физва. Гьа са вахтунда ада ресурсралди таъминарзавай са бязи организацийри тайинарнавай кIвалахар вахтунда тамамаруниз манийвал гузвайди къейдна.

Мярекатдал “Газпром межрегионгаз Махачкала” ООО-дин генеральный директор Ленар Мансуровни рахана. Ада хабар гайивал, республикада газдин 58 километр сетар цIийи хъувуна кIанзава. Адан гафаралди, сетар цIийикIа туькIуьр хъуву­нин му­раддалди, къведай йисуз Газпромдин кар­ханайри 540 миллион манат чара ийида.­

РД-дин Гьукуматдин Председателдин заместитель — чилерин ва эменнидин ала­къайрин рекьяй министр Заур Эминова газдалди таъминарзавай ва электроэнергетикадин сетар инвентаризация авунин ва энергетикадин иесисуз объектар иесиламишунин жигьетдай кьабулзавай серенжемрикай лагьана. ИкI, инвентаризациядин кIвалахар тухудайла, 1610 километр газдин сетрихъ иесияр авачирди ма­лум хьана.

“Россети Северный Кавказ” ПАО-дин генеральный директордин заместитель Сергей Усевича малумарайвал, Россиядин Президентдин тапшуругъ тамамарунин сергьятра аваз, иеси авачир эменни учетдиз къачунин кардиз РФ-дин ка­дастр­дин “Призма” ООО-ди 150 миллион манат чара ийидайвал я. Иесисуз имаратар жагъурун, абур Росреестрда учетда эцигун патал Къумтуркъала, Унцукул, Хасав­юрт районра ва Махачкъала, Хасавюрт ше­гьерра талукь ахтармишунар кьиле физ­ва. И кIвалах 2022-йисан 1-декабрдалди куьтягьун лазим я.

Яшайишдин метлеб авай имаратар электроэнергетикадин резервдин чешмейралди таъминарунин гьакъиндай ­Да­гъустандин энергетикадин ва тарифрин министр Ризван Мурадова ихтилатна. Ада региондин здравоохраненидин ми­нис­терстводик акатзавай идараяр электроэнергетикадин резервный чешмейралди таъминарунин месэла важиблуди тирдал фикир желбна. ИкI, электроэнергия хкудайла, дарманар хуьнин къайдаяр чIур жезва, медицинадин тадаракар пайгардикай хкатзава ва ида больницайра авай начагъбурун уьмуьр ва сагъламвал хата­лувилик кутазва. “Кислороддин стан­цияр­ электроэнергиядикай хкудайла, ­коронавирусдикай сагъарзавайбурун уьмуьр сифте нубатда хаталувилик акатда”, — лагьана ада. Министрдин гафаралди, йисан эхирдалди здравоохраненидин 18 идара электроэнергиядин резервдин чешмейралди таъминарда.

Дагъустандин образованидин ва илимдин министр Яхья Бучаева диде-бу­байрин къаюмвиликай хкатнавай етим ая­лар яшайишдин кIвалералди таъминаруникай лагьана. ИкI, 2019-2021-йисара етим 966 аял кIвалералди таъминарна.

Мярекатдин эхирдай Сергей Меликова РД-дин Кьилин къвалав идара ийидай кадрийрин резерв арадал гъуниз талукь теклифар гудай комиссия тешкилзавайдакайни малумарна.

«Лезги газет»