РФ-дин просвещенидин министерстводин пресс-къуллугъди хабар гайивал, ислен юкъуз Вирироссиядин “Хайи чIалан ва литературадин лап хъсан муаллим” сад лагьай конкурсдив гатIунна.
8-августдиз Россиядин просвещенидин министерстводи тухузвай и конкурсдин заочный пай башламишна. Адан макьсад хайи чIалан ва литературадин муаллимрин лап хъсан тежриба гегьеншарун, абуруз гьукуматдин патай куьмек гун ва тежрибалу муаллимар ашкъиламишун я.
Конкурсда иштиракун патал Россиядин Федерациядин халкьарикай 36 чIалал рахазвай 68 региондай тир 69 касди арзаяр ганва. Конкурсдин кIвалахриз къимет гун патал Россиядин Федерациядин лайихлу муаллимрикай, жуьреба-жуьре йисара пешекарвилин конкурсра гъалиб хьайибурукай, образованидин гьуьрметлу къуллугъчийрикай, хайи чIаларин экспертрикай ва педагогвилин вузрин векилрикай жюри тешкилнава.
Конкурс заочный ва очный къайдада кьиле тухузва. Заочный “Медиавизитка” тур 8-августдилай 20-августдалди давам жеда.
«Лезги газет»
