Квез чидани?
Нил
Асул гьисабдай и зурба вацI Египетдин мулкарилай авахьзаватIани, адан цик Африкадин 9 уьлкведин мулкарни акатзава: Судандин, Эритреядин, Эфиопиядин, Угандадин, Кениядин, Танзаниядин, Руандадин, Бурундидин ва Конгодин.
Африкада виридалайни екеди яз гьисабзавай Виктория вир Нилдин кьилин чешме я.
Нилдихъ ам авахьзавай мулкарал яшамиш жезвай агьалийрин яшайиш патал еке метлеб ава. Саки 300 миллиондив агакьна инсанри хъвадай ва дигидай яд и вацIай къачузва. Нилдин яргъивили 6852 километр тешкилзава.
Миссисипи-Миссури
Кеферпатан Америкада авай и еке вацIун яргъивилел тахминан 6275 километр ала ва ада дуьньядин виридалайни зурба вацIарин сиягьда лайихлувилелди 3-чка кьазва.
Ам США-дин ва Канададин мулкарилай авахьзава.
Янцзы
Азияда Янцзы виридалайни яргъи вацI яз гьисабзава. Ада Китайдин тарихда кьетIен чка кьунва ва уьлкве патал и вацIухъ чи йикъарани еке метлеб ава.
Къейд ийин хьи, гужлувилел гьалтайла, дуьньяда виридалайни зурба ГЭС и вацIал хкажнава. Алимри тайинарнавайвал, Янцзыдин це терг хьунин сергьятрал алай жуьреба-жуьре балугъри сирнавзава.
ВацIун яргъивилел, санлай къачурла, 5800 километр ала.
Хуанхэ
Китай чIалай таржума авурла, вацIун тIвар «Хъипиди» лагьай чIал я. Ихьтин тIвар адал цин кIаневай лиледин ранг себеб яз акьалтнава. Янцзыди хьиз, Хуанхэдини Китайдин яшайиш вилик финин карда еке чка кьунва. Адан цикай хуьруьн майишатдин кIвалахра гегьеншдиз менфят къачузва.
ВацIун эвел кьил Тибетдин дагъларин ценерив гва. Ам Китайдин 7 вилаятдин мулкарилай авахьзава. Адан яргъивили 5464 километр тешкилзава.
«Лезги газет»
