РД-дин Пенсийрин фондунин Телеграм-каналди хабар гузвайвал, 2022-йисан 1-августдилай Урусатда бязи пенсионеррин пенсияр хкаж жеда. Сифте нубатда, кIвалахдик квай пенсионерриз — 314 манатни 7 кепекдин. И жуьредик акатзавай пенсионеррин ПФР-да авай лицевой счетда страховой взносрин гьисабдай алава баллар арадал къведа.
Мадни, 1-августдилай чпин яшар 80 йисарилай алатнавай ва 1-группадин набутар тир пенсионеррин страховой пенсиядин кьадарни хкаждайвал я.
Къейд ийин хьи, яшайишдин (социальный) ва государстводин пенсия къачузвайбуруз августдин вацра кьиле фидай перерасчет талукь туш. Вучиз лагьайтIа, абурун пенсийрин кьадар къанундалди мягькемарнава ва абурун гьакъиндай гьахъ-гьисабдин баллрин къурулуш ишлемишзавач.
РФ-дин Гьукуматдин патав кардик квай Финансрин университетдин профессор Александр Сафонова “Московский комсомолец” изданидиз гайи интервьюда къейд авурвал, санлай къачурла, уьлкведа 7,3 миллион касдивай чпин пенсияр хкаж хьуник умуд кутаз жеда.
МФЦ-дай къачуз жеда
Малум тирвал, “Зегьметдин ветеран” тIвар авайбурувай государстводин патай куьмекдин жуьреба-жуьре серенжемрикай (гьам пулдин, гьамни льготрин) менфят къачуз жезва. Кьилди къачуртIа, зегьметдин ветеранриз агъадихъ галай кьезилвилер талукь я:
— шегьердин улакьда аваз пулсуздаказ санай масаниз фин;
— коммунальный къуллугърай гузвай пулдиз талукь кьезилвилер;
— ветерандиз вичиз къулай вахтунда отпуск къачун;
— государстводин стоматологиядин поликлиникайра пулсуздаказ протезар эцигун;
— муниципалитетра авай азарханайра пулсуздаказ къуллугърикай менфят къачун.
“Зегьметдин ветеран” тIвар алай вахтунда МФЦ-дин куьмекдалди туькIуьриз жезва. Герек документар: паспорт, зегьметдин книжка, 3х4 кьадардин са шикил, орденар, медалар ганвайди тестикьарзавай справка.
«Лезги газет»
