Лезгийрин чIехи шаир Етим Эминан сурал фин зи фикирдик кваз гзаф вахт тир. Эхирни зи мурад кьилиз акъатна: 8-июлдиз чун, лезги халкьдин жемиятдин векилар, лезги эдебиятдин бине кутур шаир кучукнавай СтIал Сулейманан райондин Ялцугърин хуьруьз рекье гьатна.
Чи арада Москвадин са вуздин преподаватель, физикадинни математикадин илимрин кандидат, Етим Эминакай кхьенвай ктабдин автор Мансур Куьреви, Кьурагь райондин КIирийрин хуьруьн школа-интернатдин директор, РД-дин лайихлу муаллим Надир Тагьиров, Хив райондин ЗахитIрин хуьруьн юкьван мектебдин директор, филологиядин илимрин кандидат Руслан Къарабегов, Эминхуьруьн юкьван мектебда лезги чIалан тарсар гузвай муаллим Жамилия Жигерова, Етим Эминан музейдин директор Гьайбатуллагь Манатилов, КьепIирдилай тир машгьур музыкант Женнет Римиев, РФ-дин халкьдин образованидин отличник, сарагви Мегьамедзагьир Агъамирзоев, комсомолдин Мегьарамдхуьруьн райкомдин сад лагьай секретарь хьайи Шихкерим Шагьпазов, ашукь Айдун, РД-дин лайихлу артист Даниял Къазиев ва масабур авай. Санлай — 25 кас. Теклифай ксар мадни авай: бязибурувай, жуьреба-жуьре себебар аваз, къвез хьанач.
Къейд ийин хьи, жемиятдин метлеб авай кIвалахар кьиле тухудайла, заз датIана СтIал Сулейманан райондин виликан кьил Нариман Абдулмуталибова куьмекар гудай. Алай вахтунда ада РД-дин гьукуматда кIвалахзава. Адан чкадал хкянавай Саид Темирхановни хайи чилихъ, халкьдихъ рикI кузвай регьберрикай я. За гъиле кьунвай кардикай хабар хьайила, ада администрациядивай герек куьмек аватIа жузуна. Чи тIалабуналди ада мярекат видеокамерадиз къачун патал “Кьасумхуьр” ТВ-дин векилар чахъ галаз рекье туна.
Етим Эминан сурал агакьайла, якъин хьайивал, чун къведалди са ни ятIани адан сур алай чка хъчарикай михьнавай. Дуьа авурдалай кьулухъ Надир Тагьирова чIехи шаир рикIел хкуниз талукьарнавай мярекат ачухна. Анал рахай са кьадар ксари Етим Эминан шииратдикай, уьмуьрдикай суьгьбетарна, шаирди лезги халкьдин тарихда кьунвай кьетIен чка къейдна. Мярекатдин иштиракчийрин патай арадал атай суалриз жавабар Мансур Куьревиди гана.
Гуьгъуьнлай чун вири КIири Бубадин булахдал хъфена. Чахъ галай манидарри, кьавалри — Даниял Къазиева, ашукь Айдуна, Женнет Римиева, Азим Ризаева, Надир Гьасанова Етим Эминан чIалариз кхьенвай манияр тамамарна.
Камерадиз къачур видео “Кьасумхуьр” ТВ-дин ютуб-каналда эцигна. Са куьруь вахтунда адаз килигайбурун кьадар 1 агъзурдалай алатна. Мярекат тешкилунай заз сагърай лагьайбурни хьана. Абурун арада Дагъустандин халкьдин писатель Гьаким Къурбан, машгьур шаир Пакизат Фатуллаева ва масабур авай.
Къейд ийин хьи, мярекатдиз гьазурвал акваз саки кьве варз хьанай. Зи фикирдалди, ам писди хьанач, мурад кьилиз акъатна. Етим Эмин лезги халкьдин рикI алай шаиррикай сад я. ИкI тирди кьиле тухвай мярекатди, ана иштиракай ксари, чпиз вучиз теклифнач лугьуз, заз дуствилелди чпин наразивилер къалурай юлдашрини тестикьарна. Аллагьди рагьмет гурай чIехи шаирдиз. Адан тIвар чи рикIера эбеди яз ава.
Масуб Магьмудов
