Мергьяматлувилин серенжем

30-июлдиз мергьяматлувилин “ЛЕКИ” фондуни Самурдин тамун мулкар зирзибилрикай михьунин гегьенш субботник тешкилна. Мергьяматлувилин важиблу мярекатдик чпин пай кутун патал и юкъуз Са­мур­дин тамуз Краснодардай, Москвадай, Коми Республикадай, Махачкъаладай, Каспийскдай, Дербентдай, Ахцегь, Докъузпара, Кьурагь, СтIал Сулейманан, Хив, Мегьарамдхуьруьн районрай ва маса чкайрай гзаф ксар атана. Патарив гвай хуьрерин спортзалра машгъул жезвай аялрин са шумуд дестени атанвай. Санлай иштиракайбурун кьадар ви­шелай алатнавай. 

“ЛЕКИ” фондуни спортдин, медениятдин, хайи чIал хуьнин жигьетдай кьилиз акъудзавай крарикай, серенжемрикай чна идалай виликни тIимил кхьенач. РикIел хкин, алатай йисара фондунин вилик-кьилик квай ксари районрин мулкара михьивал хуьнин бигерар кьиле тухванай.

Нубатдин мярекатдин тешкиллувилин кIвалахрик “ЛЕКИ” фондунин крар идара ийизвай директор Закир Къагьриманова, фондунин векилар тир Руслан Мегьдиханова, Максим Садикьова, Заур Балакишиева ва масабуру кьетIен пай кутуна. Абуру, субботникдин гьазурвилер акун патал са шумуд йикъан вилик чкадал хтана, тешкиллувилин крар кьилиз акъудна.

ЦIи ихьтин мярекат Самурдин тама кьиле тухунихъ авай метлебдикай, серенжемдин макьсаддикайни нетижайрикай фондунин активистри ихтилатна.

Закир  Къагьриманов. — Фондуни гьар йисуз кьиле тухузвай кIвалахрикай сад хайи чилин мулкарин михьивилихъ, абадвилихъ гелкъуьнин серенжем я. Сир туш, зирзибилди вирибуруз манийвал гуз­ва, чкайрин иервал квадарзава. Самурдин тама тухвай мярекатдихъ чун сад-садав агудунин, акьалтзавай несилдиз тIебиат хуьнин жигьетдай хъсан чешне къалурунин мана ава.

Максим  Садикьов (Краснодар). — Самурдин тамун михьивал хуьниз талукьарай серенжем пара хъсандиз кьиле фена. Шад жедай кар ам я хьи, Кьиблепатан Дагъустандин вири районрай агьалияр атанвай. И карди чак еке гьевес кутуна. Чаз аквазва хьи, йисалай-суз фондуниз ихтибарзавай, кьиле тухузвай крарик чпин пайни кутаз кIанзавай ксар артух жезва. Мярекатди чаз вири патарихъай хийир гана: тамун михьивал хвена, ватанэгьлияр, чирхчирар кIватI хьана, цIийи танишвилер хьана, лезги шурва, аш ва маса няметар тIуьна. Са гафуналди, кIвалахни авуна, ялни яна.

Самур хуьруьн кьилиз, РД-дин тIе­биатдин ресурсрин ва экологиядин министерстводин къуллугъчи Мегьамед-Гъанифа Бейбутоваз, райондин администрациядиз, иштиракай вирибуруз чна сагърай лугьузва. КIватIай зирзибилар тухудай са улакь администрацияди, сад М.-Гъ.Бейбутова чпин къуллугъдин патай тешкилнавай. Умуми кар патал виридан къуватар желб авурла, неинки Самурдин тама, гьакI герек тир маса чкайрани чавай михьивал хуьнин серенжемар тешкилиз жеда.

Руслан  Мегьдиханов (Краснодар). — Эвелни-эвел чна фондуни кьил кутур мярекатда иштиракай вирибуруз сагърай лугьузва. Куьмекар гайи Мегьа­рамдхуьруьн райондин администрация­дин кьил Фарид Агьмедовалай, адан за­мес­титель Сократ Мурадалиевалай разивал ийизва. Самурдин тамун къайгъу чIуг­ваз­вай вишелай гзаф ватанэгьлияр кIватI хьана. “ЛЕКИ” фондунихъ мярекатрин харжияр кIватIдайбурукай ибарат кIватIал ава.

Тек са Самурдин тама ваъ, чи районрин, хуьрерин мулкарани халкьди михьивилиз фикир гун герек я. Ватанперес инсанар сад-садав агудзавай, цIийи ала­къаяр арадал гъизвай мярекатар чахъ гзаф хьурай. Чаз акуна хьи, Самур­дин та­ма кьиле тухвай мярекатда аялри­ни ашкъидивди иштиракна. Жегьил несилрик ватанпересвилин руьгь кутуна.

Заур  Балакишиев (Краснодар).  — Зи фи­кирдалди, мадни садра чи стхайри гаф­ни кар сад авуна, хъсан метлеб квай мярекат кьилиз акъудна. “Чилинни чIалан михьивал хуьх!” эвер гунин гафа­р­и ватанпересвал рикIе авайди къалурна. Хайи чилиз майилвал авун, чи же­гьилриз мадни садра дуствилин чешне, садвилин къуват къалурун пара кутугай кар хьана. И кардиз рум гайи вири стхаяр сагърай!

 Азим Нуьгьов (Москва). — Самурдин там чаз Аллагьди ганвай надир, кье­тIен чка я. Чна тIебиатдин и девлет хуьн ва ге­лежегдин несилрални агакьарун герек я.

Субботникдин нетижада зирзи­­бил­рив ацIурай пуд виш кьван шешел улакьриз яна, талукь чкайриз хутахна. Фондунин векилри иштиракчийриз махсус кхьинар, фондунин логотипдин шикилар алай футболкаярни шапкаяр пишкешна.

И юкъуз тамун са шумуд чкадал “ТIе­биат хуьх!”, “Зирзибилар гадармир!”, “Там чи девлет я!”, “Чилин ва чIалан ми­хьивал хуьх!”, “ТIебиат кIан хьухь!”, “Там цIукай хуьх!” ва ихьтин маса келимаяр кхьенвай плакатарни алкIурна.

Хайи чилин абадвални берекатлувал, михьивални иервал кIанзавайбур гьа ихьтин гьакъикъи крарик кьил ку­тазвай ва кьилизни акъудзавай ватан­пе­­ре­сар я.

Куругъли Ферзалиев