Эхиримжи йикъара Дагъустанда коронавирусдик начагъбурун кьадар мад гзаф жез гатIуннава. Республикадин здравоохраненидин министерстводин пресс-къуллугъди хабар гузвайвал, и йикъара ковид акатнавай 22 дуьшуьш винел акъудна, абурукай 6 кас духтурханайрив агакьарна. Дагъустанда азардин лепе яваш хьайидалай кьулухъ и кьадар инсанар духтурханайриз рекье тунвай сад лагьай дуьшуьш я. Виликдай ковид акатнавайбурукай йикъан къене духтурханайра вини кьил 3 кас къаткурзавай.
Къейд ийин хьи, вирусдик начагъ жезвайбурун кьадар санлай уьлкведани гзаф хьанва. Арадал къвезвай гьалар ва ковиддин нубатдин лепедин вилик пад кьун алатай гьафтеда РФ-дин здравоохраненидин министерствода кьиле фейи селекторный совещанидал веревирдна. Ана медицинадин рекьяй федеральный экспертрини иштиракна.
Уьлкведин здравоохраненидин министр Михаил Мурашкодин фикирдалди, вирусдин вилик пад кьунин карда виридалайни хийирлу рехъ адаз акси раб ягъун я. Министрди гьакIни къейд авурвал, коронавирусдиз акси рапарикай виридалайни менфятлуди “Спутник V” маркадин “Гам-КОВИД-ВАК” препарат я.
РикIел хкин, Дагъустанда тIугъвал пайда хьайидалай инихъ ковиддиз акси рапар янавай агьалийрин кьадар 1 585 750-дав агакьзава. Пешекаррин меслятралди, сад лагьай сеферда раб ягъайдалай кьулухъ 6 варз арадай фейила, мад коронавирусдиз акси раб яна кIанзава.
Агьмед Магьмудов
