Пакамлай няналди Ахцегьрин базарда помидорар маса гана, хьайи 130 агъзур манат пулни гваз Рамазан (тIварар дегишарнава) вичин хванахва Магьмудан кIвализ хкведа. Иеси мехъерик кваз, кIвале касни авачир. “Мад икьван пул гваз мехъерик фидач хьи”, — фикирна ада. Мехъерикай хкведалди, пул авай кисе цура малдин тIуна эцигун кьетIна. Маса къулай чка жагъанач…
Мехъерик тIуьна-хъвана, кефияр куьк яз хтай итимриз гьаятдин чилел инал-анал пулар алаз аквада. РикI аватна Рамазанан! Фена килигайтIа, тIуна вичи эцигай чкадал пулдин кисе аламач. Тадиз “Вагь, гуж хьана, пул угърийри чуьнуьхна!” — гьарай-вургьай акъудда мугьманди.
И кIвалах пара такIан хьанвай Магьмуда милицайриз хабар гуда. Атана башламишда абуру чпин къайдада силис.
— Валлагь, стхаяр, и чи магьледа чуьнуьхардай ксар авайди туш, гьинвачтIани, им данадин къелет я, — кIвалин иесидин гиман гьаятдин пипIе секиндиз гирнагъиз ацукьнавай са йисан данадал фида.
— Икьван хъсан къацу векь авай гатун юкъуз данади кьацIай пул авай кисе неч хьи,- инанмишсуздаказ лугьуда Рамазана.
Гьа и арада мехъерикай хтай кайвани Серминазани пул данади тIуьн мумкин кар тирди тестикьарда.
Месэла ахтармишун патал милициядин сержантди данадин тIишев 200 манатдин 2 чар тухуда. Нини акал тавуна, гьайванди мез галтадна, пул сивиз тухвана туькьуьнда. И кар акур Магьмуда: “Ваъ, стхаяр! Зи папаз вичи хуьзвай данадин хесетар чалай хъсандиз чида. Яхъ, гадаяр, кIвачер. Я пул жеда, я як, я туш, — абур кьведни санал”,- лагьана, гьайван алай чкадал ярхарна, кьамувай хци кант чIугвада…
Гьакъикъатдани, пул гьа данадин хуквада авай. Амма, гьайиф хьи, 130 агъзур манатдикай Рамазанан гъилиз хтайди 37 агъзур манат хьана…
Якни хьана эхир!.. Шад тир пул жагъун хъувур хванахва…
Д. Шерифалиев
