Чакай гзафбуру машинар гьалзава. Гьавиляй чаз рекьерин гьерекатдиз талукь къанунар, къайдаярни хъсандиз чир хьун лазим я. ТахьайтIа жермеяр гуниз мажбур жеда. Бязи дуьшуьшра лагьайтIа, улакь гьалдай ихтиярар гузвай документдикайни вахтуналди магьрум хьун мумкин я. Гьихьтинбур я а дуьшуьшар?

Лагьана кIанда, уьлкведа кьабулнавай къанунрал асаслу яз, улакь гьалдай ихтиярар гузвай документдикай 5 дуьшуьшда магьрумзава:

1. эгер машиндин нумраяр аквазвачтIа ва я абур ерли алачтIа (магьрумарзавай вахт 1-3 варз);

2. эгер машиндал алай нумраяр къалпбур ятIа (6-12 варз);

3. пияндиз машин гьалайла (1,5-2 йис);

4. рекье машиндин йигинвал къанундалди тайинарнавай кьадардилай са шумуд сеферда гзафарайла (превышение скорости на 60-80 км/ч) (4-6 варз);

5. ракьун рекьелай элячIдайла, рекьерин гьерекатдиз талукь къайдаяр чIурайла (3-6 варз).

Гьар садаз чир хьун герек я, рекьерин гьерекатдиз талукь къанунар, къайдаяр чIурунай улакь гьалдай ихтиярар гузвай документдикай магьрумардай мумкинвилер анжах суддиз ава. Судди къарар акъудайдалай кьулухъ 10 югъ алатайла, ам къуватда гьат­зава. Гьа и юкъуз­ документ ГИБДД-диз вахкана кIанзава.

РикIел хуьх: инспектордиз куьне рекьерин гьерекатдиз талукь къанун чIур­навай чкадал квевай улакь гьалдай ихтияр гузвай документ вахчудай ихтияр авач.

Агьмед Магьмудов