Адет хьанвайвал, акушеркайрин международный Ассоциациядин теклифдалди гьар йисуз дуьньядин 50-далай виниз уьлквейра, гьа жергедай яз Россиядани инсандин уьмуьрда гзаф важиблу пешедин сагьибрин-акушеркайрин-международный югъ къейдзава. Абурун пешекарвилелай, чирвилерилай ва тежрибадилай аял хазвай гьар са дишегьлидин ва хьанвай гьар са аялдин сагъламвал, гзаф вахтара гьатта уьмуьрни аслу я. Акушеркайри документар къайдада жедайвал туькIуьрзава. Аял хадайла (хайидалай кьулухъни), абур геле­жегдин дидедин патав жезва, дишегьлийриз медицинадин лазим куьмекар ва марифатдинни эдебдин насигьатар гузва. Са гафуналди, аялар хадай кIвализ атана, анай хъфидалди, акушеркаяр абурун  патав жезва.

Акушеркайрин международный йикъан сергьятра аваз, жуьреба-жуьре меслятар гудай ва мергьяматлувилин серенжемар, семинарар, гуьруьшар кьиле тухун адет хьанва. Абурун макьсад и пешедин кесерлувал хкажун, кьилиндини обществодиз и кIвалахдин важиблувиликай, жавабдарвиликай хабар гун я. Дугъриданни, медсестраярни акушеркаяр духтуррин куьмекчияр, лугьудайвал, духтуррин эрчIи гъилер я.

Махачкъала шегьердин аялар хадай 2 ва 4-нумрайрин кIвалера акушерка яз зегьмет чIугвазвай  Казимова  Гульнара  Ясиновна  вичин везифайрив еке жавабдарвилелди эгечIзава. Адахъ и рекьяй 30 йисан тежриба ава. Зегьметдин рехъ ада, Махачкъала шегьердин аялар хадай 1-нумрадин кIва­лелай башламишна. Ам высший категория авай акушерка я. Алай вахтунда медицинадин рекье къуллугъзавайбурулай шикаятдин тIимил ванер къвезвач. Амма вичин кIвалахдив рикI гваз эгечIзавай Гульнара Ясиновнадикай дишегьлийрин сивяй адан инсанвилин ерийрикай, жавабдарвиликайни пешекарвиликай анжах алхишрин ванер хьана. Ингье адан тIварцIихъ лугьуз­вай келимаяр: “Гульнара Ясиновна, Гульнара вах къайгъударвални регьимлувал сифте чкадал эцигнавай кас я. Ам аял хазвай гьар са дишегьлидивни куьрпедив еке жавабдарвал хиве аваз, галатун тийижиз, вичин багърийрив хьиз эгечIзава. Ам гъилни, рикIни михьи дишегьли я”.

Гульнара Казимовадихъ галаз фадлай таниш тир зазни адан инсанвилин виниз тир ерийрикай чида. Ам мукьва-кьилийризни, къуни-къуншийризни эверай гьай я. За хьиз, ам чидай амай ксарини адан пешедал рикI  хьун кьетIендиз къейдзава. Дугъриданни, чIехи ва мергьяматлу рикIин михьивилелди, дерин чирвилералди, пешедиз вафалу хьуналди Гульнара Казимовади вичи кIва­лахзавай аялар хадай кьве кIвалени гьам дидейрин, гьамни а кIвалерин кьиле авай ксарин патай ва гзаф миллетрин векилрикай ибарат тир чIехи коллективда авторитет, гьуьрмет къазанмишнава. Аферин!

2008-йис. Махачкъала шегьерда аялар хадай 4-нумрадин кIвал ачухна. Иниз чпихъ виниз тир чирвилерни пешекарвал авай тежрибалу духтурарни акушеркаяр кIватI­завай. Аялар хадай отделенида кIвалахун патал теклифайбурун арада Гульнара Казимовани авай. И карди адан пешекарвилин дережадин гьакъиндай мад сеферда шагьидвалзава.

Са тIимил йикъар идалай вилик чаз Гульнара Казимовадихъ галаз ихтилатардай мумкинвал хьана. Ада вичин рикI алай пешедикай,­ аялрикай, хайи ватандикай суьгьбетарна…

Гульнара Ясиновна 1968-йисуз Ахцегь райондин Къутунхърин хуьре дидедиз хьана. Ина 8-класс, Каспийскда 8-нумрадин юкь­ван школа акьалтIарна. Жегьил руша Каспийск шегьерда медучилищеда кIелу­нар давамарун кьетIна. Адан буба (кьилин кьве образование авай савадлу кас) хуьруьн школада муаллим тир. Руша шегьерда кIелунар давамарунал, чирвилер къачунал бубади разивална. Гаф кватай чкадал лугьун, ада вичин 5 веледдизни образование къачудай, пешейрин иесияр жедай мумкинвал гана.

1988-йис. Гульнаради медучилище агалкьунралди куьтягьна. А чIавуз Махачкъаладин  аялар хадай 1-нумрадин кIвалин кьилин духтур Ризван Каримова медучилище акьалтIарайбурукай тек са Гульнарадиз, “Чаз вун хьтин хъсан чирвилер авай пешекарар герек я” лугьуналди, кIвалах тек­лифна. Анлай инихъ 30 йис алатнава. Гульнара хьтин пешекарар исятдани герек я. Гьавиляй ада аялар хадай са кIваляй ма­са кIвализ тади ийизва, кьве чкадани адан куьмек герекзава. Йикъа 10-12 (бязи йикъарани 25-дав агакьна) бицекI кьабулзава. Дидейриз, хизанриз шадвални бахтлувал гъун ада вичин уьмуьрдин макьсад яз гьисабзава.

— Аял хайи дишегьлидин шадвилив ацIанвай вилер, бицIек дуьньядал атунин сифте гьарай-ибур са куьнивни гекъигиз тежер декьикьаяр я. Чун, вири коллектив, гьар са дишегьли рази жедайвал, куьмек гуз гьазур я. Гьайиф хьи, аял хазвай ди­шегь­лияр вири сад туш. Садбур разивалдайбур, садбур чпин тахсир чи хиве тваз, чеб хизанрин вилик гьахъариз алахъдайбурни гьалтда. Завай инанмишвилелди лугьуз жеда, коллективда зегьмет чIугваз­вай гьар са кас чпин кIвалахдин везифайрив намуслувилелди эгечIзава. Тек-бир дуьшуьшра, чалай аслу тушир себебар аваз, чIуру нетижайрал расалмиш хьайила, чна дишегьли дидедин рикIин тIал жу­ван­ тIал хьиз гьиссзава. МасакIа хьунни герек туш,-суьгьбетзава Гульнара Ясиновнади.

Малум тирвал, къенин юкъуз (4-нумрадин кIваликай чун рахазвач, аялар хазвай дишегьлийри са кьадар пул гун герек тир анаг кьилдин касдин хсусиятда авай чка я) Махачкъаладин аялар хадай 2-нумрадин кIвале вири шартIар тешкилнава. Инин кьилин духтур Зарема Межидовадилай неинки аялар хаз атанвай ва чпин сагъламвал мягькемарзавай дишегьлияр, гьакI медперсонал патални лазим тир вири шартIар тешкилиз алакьнава,-суьгьбет давамарна Г.Казимовади.-Дарамат хъсандиз ремонтнава. Кьилдин палатаяр кIандайбуруз ихьтин къулайвилерни хьанва. Лазим тир раб-дармандалди таъмин я. Алай аямдин истемишунриз жаваб гузвай аппаратура ава. ТIямлу ва ерилу тIуьнар гузва.

Пешекар вичин рикIик къалабулух кутазвай крарикайни рахана. Аял ханмазди дишегьлиди вичинни чагъадин шикилар гьасятда соцсетра эцигзавайбуруз, аялдин гьал хабар кьадалди, телефон тIалабзавай­буруз, духтуррин меслятрал амал тийизвайбуруз… Гульнара Казимовади вичин мергьяматлу рикIин эмирдалди  насигьатар гуда.

Авайвал лагьайтIа, чна суьгьбетзавай макъамда заз, Гульнара Казимовадин кIва­лахдин тежриба ва пешекарвал фикирда кьуртIа, адан намуслу зегьметдал лазим тир къимет эцигнавачиз акуна. Адахъ са ар­­тух еке шабагьар авач. Амма им зи фикир я. Г.Казимовади лагьайтIа, и жигьетдай гьич са кIусни шикаятзавач. Ам гьахъни я жеди.

-За гьамиша жуван кIвалах гьакъисагъвилелди кьилиз акъудун важиблу яз гьисабна, исятдани гьакI я. БицIекар гзаф кIан­завайвиляй, зун жуван рикI  алай пешедал машгъулни жезва. Наградайрихъ калтугайди туш. Заз кьилин шабагь гъилиз сагълам бицIекар атун я,-лугьузва ада.

Гульнара Ясиновнади вичин уьмуьрдин юлдаш Нияз Казимовичахъ галаз санал кьве велед чIехи авунва. ДГУ-дин «Финансы и кредит» факультет акьалтIарнавай Мадинадихъ вичин хизан, кьве бала ава. Хва Гьажибубади кьилин кьве образование (ДГУ-дин “Финансы и кредит” ва ДГТУ-дин радиотехнический факультетар акьалтIар­на) къачуна, Ростелекомда инженер яз зегьмет чIугвазва.

Гульнара Казимова гзаф мугьманперес кIвалин иесини я. Адаз галатун чидач. Ада мугьманар рикIин шадвилелди кьабулда. Са кIусни фурс гвачирвал адан уьмуьрдин къайда я. Къуй хизанда мадни хушбахтвал, квехъ чандин сагъвал хьурай, гьуьрметлу Гульнара Ясиновна!

Рагнеда Рамалданова