Роспотребнадзордин РД-да авай Управленидин пресс-къуллугъди хабар гуз­вайвал, и йикъара кьиле фейи Европадин иммунизациядин гьафтеда Дагъустан Республикадини иштиракна. РикIел хкин: Виридуьньядин здравоохраненидин организациядин (ВОЗ) членар тир государствойри туькIуьрнавай чIехи пландин бинедаллаз гьар йисуз виринра иммунизациядиз талукь яз (садакай масадак акатдай азаррин вилик пад кьунин макьсаддалди махсус рапар ягъун) Европадин иммунизациядин гьафте (ЕНИ) тухузва.

Алай йисуз важиблу и серенжем “Вилик пад кьан. Азаррикай хуьн. Махсус рапар ягъун” лишандик кваз кьиле тух­вана.

Европадин иммунизациядин гьафтедин макьсад агьалияр иммунизациядин-азаррин вилик пад кьунал гьалтайла виридалайни менфятлу такьатдин, рапар ягъуналди гьар са касди неинки вич, гьакI патарив гвайбур хуьзвайдан гъавурда тун я. Къенин юкъуз виринра иммунизация инсанрин уьмуьр ва сагъламвал хуьнин рекьяй здаравоохраненидин хиле еке агалкьунар къазанмишнавай ва менфятлу серенжемрикай сад яз гьисабзава. Алатай йисара азаррин вилик пад кьунин махсус рапар ягъуналди, садакай масадак акатдай хейлин азаррикай хвена. Тарихдай чаз малум тирвал, азаррикди агъзурралди инсанар телеф хьанай. Къенин юкъуз Россия полиомиелитдикай азад уьлкве яз гьисабзава. И азадвални анжах иммунизациядин нетижада къазанмишиз алакьна.

Дагъустан Республикада полиомиелитдилай гъейри, дифтерия, краснуха азаррикди начагъ хьун амач. Столбняк, гепатит В азарар лагьайтIа, лап тIимил (2016-йисуз анжах са дуьшуьш) гьалт­зава.

* * *

Дагъустандин Роспотребназдорди 1-майдилай 15-майдалди ккIламри, кIасу­никди акатзавай азаррин вилик пад кьунин макьсаддалди “тади гьалда хабар гу­дай линия” кардик кутунва. ИкI, агьалий­ривай, Роспотребнадзордин Дагъустанда авай Управленидин пешекарривай телефондин  8 (8722) 69-19-52  (Махачкъа­ла шегьер) нумрадиз зенгна, ккIламри кIасуникди акатзавай азаррин вилик пад кьуниз талукь серенжемрикай хабар кьаз жеда. Электронный transport­rd@yan­dex.ru адресдиз чар рекье твадай мумкинвални ава. Пешекарри йикъан сятдин 11-далай 3-далди агьалийри итиж ийизвай суалриз жавабар гуда.

Гьазурайди — Рагнеда Рамалданова