Дагъларин уьлкведин агьалийри Дагъустандин Конституция кьабулай югъ къейдна. Шегьерра, хуьрера Конституциядин йикъаз талукьарнавай шад мярекатар кьиле фена. РикIел хкин, 2003-йисан 26-июлдиз Дагъустан Республикадин Конституция кьабулна. Ада, Россиядин Федерациядин субъект, адан къакъудиз тежер пай яз, чи республикадин дережа тестикьарна, гьукумдин ва чкадин самоуправленидин органрин кIвалахдин, демократвилин, гражданвилин общество туькIуьрунин принципар тайинарна. Закондин вилик виридан барабарвал, фикирдинни гафунин, намусдинни диндихъ инанмишвал авунин азадвал, чирвилер къачун, яшайишдин жигьетдай хуьн ва медицинадин рекьяй куьмек агакьун патал ихтиярар — и ивирар Республикадин Конституциядин бинеда гьатнава.
РД-дин Конституция кьабулайдалай инихъ цIийи несил арадал атанва, гьалар дегиш хьанва, амма Конституция дибдин закон ва общественный уьмуьрда марифатдин жигьетдай рехъ къалурзавай такьат яз ама. Къе Дагъустанда законлувал ва къанун-къайда гуьнгуьна гьатнава, республика дурумлудаказ виликди финин рекьел экъечIнава. Конституцияди гузвай мумкинвилер уьмуьрдиз кечирмишун, адан нормаяр, положенияр гьар йикъан уьмуьрда чешне хьун патал хейлин крар хъувунани кIанзава. Конституциядин гьарф ва руьгь вилив хуьн, закондал ян тагана амал авун, яратмишунрин тегьерда зегьмет чIугун Дагъустандин халкьарин садвилин, меслятвилин ва нетижада абадвилин, чи маканди цуьк акъудунин ва адан агьалийрин гележег бахтлуди хьунин замин я.
Идан гьакъиндай РД-дин Кьил Сергей Меликова 26-июлдиз меркездин “Дуствилин кIвале” зегьметда, яратмишунра, спортда, Ватандиз къуллугъ авунин карда еке агалкьунар къазанмишнавай муаллимрив, духтуррив, гьукумдин, къайдаяр хуьдай органрин къуллугъчийрив ва маса пешекаррив гьукуматдин шабагьар вахкудай вахтунда лагьана.
И юкъуз филармониядин гатун залда суварин йикъаз талукьарнавай чIехи концертни гана. Ана республикадин искусстводин, музыкадин, хореографиядин, эстрададин тIвар-ван авай коллективри, манидарри, музыкантри иштиракна. Тамашачийри чи халкьарин чIаларал тамамарай манийрихъ хушдиз яб акална. Кьуьлердайбурун ансамблрин коллективриз гурлудаказ капар яна. Республикадин театррин коллективри, жегьил артистри уьлкведин ва Дагъустандин тарихдиз, халкьарин садвилиз, дуствилиз талукьарнавай сегьнеяр къалурна.
Россиядин хьиз, Дагъустандин вири халкьарини чи уьлкведин ва республикадин экономика мадни вилик тухуникай, гьар са агьалидин ихтиярар хуьникай, агьваллувал хкажуникай, гьар са райондиз экономикадин, яшайишдин гьалар хъсанардай сад хьтин къулай шартIар тешкилуникай, обществода, уьмуьрдин вири хилера крар авай гьал жезмай кьван хъсанаруникай фикирзава. Инанмиш я, гьа икI женни ийида.
Чи мухбир
