25-июлдиз Дагъустандин Кьил Сергей Меликова Махачкъалада РФ-дин транспортдин министрдин заместитель Валентин Ивановахъ галаз гуьруьш кьиле тухвана. “Лезги газетдиз” РД-дин Кьилин пресс-къуллугъди хабар гайивал, мярекатда гьакIни республикадин Гьукуматдин Председателдин заместитель Ризван Гъазимегьамедова, транспортдин ва рекьерин майишатдин министр Жамбулат Салавова, “Объединенная приборостроительная корпорация” Государственной корпорации “Ростех” АО-дин генеральный директор Сергей Сахненкоди ва Упрдор “Кавказ” ФКУ-дин кьил Александр Лукашука иштиракна.
Дагъустандиз мугьман хьунин сергьятра аваз, В.Иванов республикадин рекьерин инфраструктурадин объектриз килигна ва РФ-дин государстводин часпардилай машинар ахъайзавай “Ярагъ-Къазмаяр” пункт цIийикIа туькIуьр хъийизвай гьалдихъ галаз таниш хьана.
Гуьруьшдал малум хьайивал, “Ярагъ-Къазмаяр” пунктунилай гъейри, мукьвал тир йисара государстводин часпардал алай “ЦIийи Филер” ва “Тагьирхуьруьн-Къазмаяр” пунктарни цIийикIа туькIуьр хъийидайвал я. Идалай гъейри, сергьятдилай элячIдай мад са пункт — “Самур-2” — эцигда.
Махачкъаладин гьуьлуьн алишверишдин портуникай рахадайла, В.Иванова къейд авурвал, республикадай Ирандиз жуьреба-жуьре суьрсет гваз рекье гьатзавай гимийрин кьадар кьве сеферда артух хьанва. И жигьетдай порт вилик фин давам жезва.
Дагъустандин меркездай Азербайжандихъ галаз авай государстводин сергьят галай патахъ физвай шегьре рекье алай вахтунда бязи участокар цIийикIа туькIуьр хъувунин кIвалахар кьиле физва. Малум хьайивал, цIи — 43, къведай йисуз 68 километрдин мензилда рехъ ремонтда.
Гуьруьшдин эхирдай Сергей Меликова Дагъустандиз мугьман хьунай Валентин Ивановаз сагърай лагьана ва транспортдин “Север-Юг” дегьлиз вилик тухунин шартIара республикадин транспортдин инфраструктурани еримлу авунихъ еке метлеб авайди къейдна.
Агьмед Магьмудов
