ДОСААФ-дин (Россиядин армиядиз, авиациядиз ва флотдиз куьмек гудай гуьгьуьллу общество) — Россиядин жемиятдинни государстводин тешкилатдин кьилин макьсад уьлкведин оборона ва милли хатасузвал мягькемаруниз куьмекун я. ДОСААФ-дин региондин отделенияр 80 субъектда, гьа гьисабдай яз, Дагъустандани ава.
И йикъара Дагъустан Республикадин Кьил Сергей Меликов Россиядин ДОСААФ-дин председатель Александр Колмаковахъ галаз гуьруьшмиш хьана. Абуру Дагъустан Республикадин Гьукуматдини ДОСААФ-ди санал кIвалахунин гьакъиндай чарарал къулар чIугуна.
Кар алай месэлаяр веревирд ийидайла, кьве терефни ахьтин фикирдал атана хьи, ДОСААФ-ди республикада жегьилриз военный ва ватанпересвилин рекьяй тербия гудай, жегьилар военный къуллугъдиз гьазурдай ва гьакI культурадин, информациядин, тешкиллувилин рекьяй санал кIвалахдай зонайрин центраяр тешкилдайла куьмекар гуда.
Кьилди къачуртIа, РД-дин Гьукуматди жегьилриз военный ва ватанпересвилин рекьяй тербия гунин, жегьилар военный къуллугъдиз гьазурунин карда тешкилзавай мярекатар уьмуьрдиз кечирмишдайла, ДОСААФ-дин къурулушдин идарайрин дараматар къайдадик кваз хуьнин, военный, ватанпересвилин мярекатар тухунин, спортдинни техникадин рекьяй аялринни жаванрин школаяр, клубар, секцияр, кружокар арадал гъунин ва республикада ДОСААФ-дин авиациядин кIвалахдал чан хкунин карда Россиядин ДОСААФ-дин мумкинвилерикай менфят къачуда.
Россиядин ДОСААФ-ди гьакI «Зегьмет чIугваз ва оборона ийиз гьазур я» Вирироссиядин физкультурадинни спортдин мярекатра иштиракда. И жуьреда Россиядин ДОСААФ-ди республикада вад йисуз кIвалахда.
Александр Колмакова ДОСААФ-дин региондин отделенидиз куьмекар гунай Сергей Меликоваз сагърай лагьана. “Дагъустандин отделение, адет яз, чи лап хъсанбурукай сад я. Инанмиш я, къе чна къулар чIугунвай документди кIвалахдин менфятлувал мадни хкажда”, — къейдна А.Колмакова.
Хийир Эмиров
