“Россети — Северный Кавказ” компаниядин “Дагэнерго” филиалдин пресс-къуллугъди ислен юкъуз хабар гайивал, алатнавай зур йисан вахтунда Дагъустандин энергетикри 225 млн. манатдив агакьна къиметдин электроэнергия чуьнуьхнавайди винел акъуднава.
Гъилевай йисан зур йисуз электроэнергия чуьнуьхай 1350 дуьшуьш дуьздал акъуднава. Малум хьанвайвал, чинеба ишлемишнавай электроэнергиядин кьадар 56,5 млн. килловат сятдив агакьнава, яни, пулдиз элкъуьрайла, ида 224,9 млн. манат тешкилзава.
Пресс-къуллугъдин векилди алава хъувурвал, электроэнергия чуьнуьхай гьар са дуьшуьшда къайдаяр хуьдай органар хабардарна. Йисан сифте кьилелай уголовный 6 ва административный 118 дело къарагъарнава.
Алатай йисуз республикада са миллиард манатдин къимет авай электроэнергия чинеба ишлемишна. “Россети — Северный Кавказ” компаниядин делилралди, Кеферпатан Кавказдин Федеральный Округдин регионра электроэнергия чуьнуьхзавай дуьшуьшрин са пай Дагъустандал ацалтзава.
«Лезги газет»
