Курхуьруьнви Алимирзоев Самурхана Махачкъалада кIелзавай. 1939-йисуз ам финнрихъ галаз хьайи дяведиз тухванай. Самурхана са шумуд женгина иштиракна. Дяве куьтягь хьайила офицер кIвализ рекье гьатна. Амма ахгакьнач, рекье амаз немсери вегьенвайдакай ва Ватандин ЧIехи дяве башламиш хьанвайдакай хабар хьана.
И вахтунда акъатай махсус приказдин бинедаллаз вишералди масабурухъ галаз санал Самурханни кьулухъ элкъуьрна ва фронтдиз тухвана. Сифте вахтара Алимирзоева вичикай кхьенай, шикилни галаз кIвализ чар рахкурнай. Мад Самурханакай са хабарни хъхьанач. Гуьгъуьнлай командир Алимирзоев Самурхан гел галачиз квахьнавайвилин хабар хтана.
Самурхан свас тагъанвай, чагъинда авай жегьил тир.
Чи хуьряй фронтда пуд Самурхан — Алирзаев Самурхан, Набиев Самурхан, Алимирзоев Самурхан — гел галачиз квахьна. Абурун къаматар хуьруьнбуру чпин рикIера хуьзва. Алай вахтунда школьникриз, жегьилриз абурукай суьгьбетарзава, рикIел хкизва, памятникар, обелискар къайдадиз гъизва, михьивилерзава.
Райсудин Набиев
