Яшлу инсанрихъ гелкъуьнай гузвай пособидикай бязи делилар
Эвездин (компенсационный) пул I группадин инвалидрихъ, яшар 80 йисалай виниз тир агьалийрихъ ва медицинадин себебар аваз гелкъуьн тешкилунин игьтияж авай 80 йисал къведалди яшара авайбурухъ гелкъвезвайбурувай къачуз жеда. Къейд ийин хьи, эвездин пул зегьметдиз къабил, кIвалахдик квачир, бейкарвилин рекьяй учетда акъваз тавунвай касдиз тайинарзава.
Яшар 80 йисарилай алатнавай яшлубурухъни инвалидрихъ гелкъвезвайдан зегьметдин стаж гьисаба кьазва. Эгер яшлубурун, инвалидрин яшар 80 йисарив агакьнавачтIа, и дуьшуьшда стажни гьисаба кьазвач.
Гьа са вахтунда са шумуд касдихъ гелкъвез жеда. Пособие гьар са касдиз талукь яз гайитIани, стаж анжах са касдихъ гелкъвезвайди хьиз гьисаба кьада.
КIваляй экъечI тавуна
Алай девир интернетдинди я. Идахъ галаз алакъалу яз, хейлин крар кьилиз акъудиз регьят хьанва. Эгер виликдай чарар-цIарар, жуьреба-жуьре документар гьазурун патал герек идарайриз фена кIанзавайтIа, исятда ахьтин игьтияж амач. Чи йикъара 70-далай виниз къуллугъар кIваляй экъечI тавуна туькIуьриз жезва.
Алай вахтунда гзаф кьадар идарайри агьалийриз ийизвай къуллугъар электронный къайдадиз элкъуьрнава. И карди кIвалахни кьезиларзава, агьалийриз къулайвални тешкилзава. Мисал яз, электронный къайдада аялрин пособияр, гъуьрчехъандин билет туькIуьриз, эцигунардай ихтиярар къачуз, аял бахчадиз ракъурун патал нубатда акъвазиз ва хейлин маса месэлаяр гьялиз жезва.
Электронный къайдада менфят къачуз жезвай вири къуллугърин сиягь РД-дин рекъемрин рекьяй вилик финин министерстводин сайтда чапнава.
«Лезги газет»
