И йикъара­ заз Эминхуьряй тир Исмаил Агьмедова ва агъа­стIалви  Рамазан  Дадашева чпин цIийи ктабар — “Хутаргъар” ва “Ме­хъерин шурва” — савкьат яз гана.

Абур Махачкъалада “Мавел” чапханада акъуднава. Ктабриз редакторвал республикада маш­гьур журналист ва публицист Нариман Ибрагьимова авунва.

224 чиникай ибарат тир “Хутаргъар” ктабдин автор яргъал йисара “Аламишинский” совхозда бригадирвиле ва профсоюздин комитетдин председателвиле кIвалахай хутаргъви Исмаил Агьмедов я. Са шумуд йисан вилик ада вичин хайи хуьруькай “Хутаргъар” тIвар алаз сад лагьай ктаб акъуднай.

И.Агьмедова вичин хуьруьнвияр тир 170 касдикай делилар ва абу-рун шикилар кIватIна, “Хутаргъвияр” ктаб чапдай акъудна. Ам “Хуьруькай”, “ПIирерикай ва мискIин­ри­кай”, “Яру партизанар”, “Дяведин иш­тиракчияр”, “Къизгъин чкайра хьайибур”, “Алимар”, “Спортсменар”, “Духтурар”, “Муаллимар”, “Хуь­руьн майишатдин пешекарар”, “Игит дидеяр”, “Культурадик пай кутурбур”, “Шиирар” кьилерикай ибарат я.

Ктабда Хутаргърин хуьруьхъ, адан тIебиатдин гуьзел ва тарихди­н чкайрихъ галаз алакъалу хейлин шикиларни ганва.

Исмаил Агьмедова ктаб акъудуниз пулунин такьатралди куьмек гунай хутаргъви кьегьал ва мерд хва Шагьпаз Асахановаз сагърай лугьузва.

* * *

“Мехъерин шурва” Рамазан Дадашеван къелемдикай хкатнавай 3-ктаб я. Ана Р.Дадашева эхиримжи йи­сара кхьенвай гьикаяяр гьатнава.­

“Мехъерин шурва” ктаб яцIу жил­дер алаз, 150 экземплярдин кьадарда аваз акъуднава.

Исмаил Агьмедоваз ва Рамазан Дадашеваз цIийи ктабар мубарак авунихъ галаз сад хьиз, чаз абу­рухъ мягькем сагъламвал, яратмишунрин рекье мадни еке агалкьунар хьана кIанзава.

Хазран Кьасумов