СтIал Сулейманан районда гъвечIи ва юкьван карчивилин векилрин арада кьиле тухвай “Йисан карчи” конкурсдин нетижаяр кьуна.

РикIел хкин, муниципалитетдин администрациядин финансринни экономикадин управлениди тешкилнавай и конкурсдин макьсад районда карчивилин хел виликди тухуниз куьмек гуникай, карчивилин ви­ридалайни хъсан тежрибаяр винел акъудуникай ва раиж авуникай, гъвечIи ва юкьван карчивилин виридалайни нетижалу карханаяр, гьакIни  налогрин “Пешекар дуллухдилай налог” махсус къайдадалди кIва­лахзавай кьилдин ксар гьевеслами­шуникай ибарат я. Конкурсдиз арзаяр алай йисан майдиз кьабулиз башламишнай. Конкурсдин гъалибчияр ва пишкешриз лайихлу хьайибур вири терефрихъай къимет гайидалай кьулухъ хьайи баллрин кьадардиз килигна хкяна. Къимет гудайла, асул гьисабдай 2021-йисуз авур кIва­лахдал бинеламиш хьана.

ИкI, конкурсдин гъалибчи леж­бервилинни  фермервилин  майишатдин (КФХ) регьбер Раким  Гьайвазов хьана. Пишкешдин чкайриз кьилдин карчи тир Муслим  Жабраилов ва КФХ-дин регьбер Заур Къамберов лайихлу хьана.

Пишкешар гунин мярекат 18-июлдиз СтIал Сулейманан райондин администрациядин дараматда кьиле фена. Конкурсдин финалдиз акъатай карчийриз  сер­тифи­катар ва къиметлу пишкешар гана, хабар­ гуз­ва райондин информациядин къуллугъди.

Муниципалитетдин кьил Саид Темирханова  карчийриз райондин экономика еримлу авунин кардик пай кутунай,  алакъада аваз ва мергьяматлу крар рикIелай ракъур тавуна кIвалахунай сагърай лагьа­на ва гележегда мадни еке проектрал машгъул жедай мумкинвилер ачух хьун алхишна.

Чи мухбир