Дагъустанда 2025-йисалди милли “Демография” проектдин сергьятра аваз аялрин 55 бахча эцигна акьалтIарун фикирдиз къачунва. Республикадин образованидин ва илимдин министерстводин пресс-къуллугъдин делилралди, анра, санлай къачурла, 7888 аял патал чкаяр жеда.
Къейд ийин хьи, регионда аялрин бахчайрин кьитвал екеди я. Малум тирвал, алай вахтунда бахчайриз фин патал агъзурралди аялар нубатра акъвазнава.
Винидихъ тIвар кьур министерстводин пресс-къуллугъдин малуматралди, и кар Дагъустанда хазвай аялрин кьадар артух хьунихъ галаз алакъалу я. Идалай гъейри, эхиримжи йисара дагъдин хуьрерай шегьерриз куьч жезвай агьалийрин кьадарни гзаф хьанва. Нетижада шегьерра кардик квай бахчайрал алава пар ацалтзава.
Бес кьадар бахчаяр эцигна акьалтIардалди, арадал атанвай гьалар пайгардик кутун патал мектебра 8 йисал къведалди яшара авай аялар кьабулдай махсус группаяр тешкилнава. Абур кьве жуьрединбур ава: аялар тайин вахтуналди кьабулзавайбур ва адетдин бахчайри хьиз кIвалахзавайбур.
Чи мухбир
