15-июлдиз ДГМУ-да мектебда кIелунин алатнавай йисуз чирвилер къачунин карда кьетIен агалкьунар хьайи аялар къаршиламишунин мярекат кьиле фена. Абурун арада Вирироссиядин олимпиадайрин, конкурсрин гъалибчияр ва ЕГЭ-дай виридалайни виниз тир баллар къазанмишай 30 жаван авай.
Мярекат ачухдайла, республикадин Кьил Сергей Меликова чирвилер къачунин карда еке агалкьунар хьанвай аялриз, гьакIни абурун мумкинвилер ачухиз куьмек гайи муаллимриз, тербиячийриз тебрикдин келимаяр лагьана.
“Къенин юкъуз куь вилик цIийи сергьятрив агакьарунин, мадни муракаб месэлаяр гьялунин, алай аямдин асантбур тушир суалриз жавабар жагъурунин рекьер ква ва куьн и крариз гьазур яз хьун лазим я. Куь несилдин къуват азаддаказ фикир ийиз алакьуна ава. Ихьтин мумкинвал квез чIехи несилди кьиле тухванвай зурба кIвалахрин нетижада ачух хьанва. Квевай адетдинбур тушир къарарар кьабулиз жезва. Куьн дирибашвилелди муракаб месэлайрив эгечIзава ва гьеле къемаз хъсан агалкьунар къалурзава. Заз кIанзавайди куьн хьанвай агалкьунрал акъваз тавун я”, — лагьана Сергей Меликова, жегьилрихъ элкъвена.
РД-дин образованидин ва илимдин министрдин заместитель Аида Далгатовади виниз тир нетижайрив агакьаруник мектебар акьалтIарнавай аялри, абурун муаллимри ва диде-бубайри кутунвай пай екеди тирдакай лагьана.
Эхирдай мектебар акьалтIарнавай гьар са аялдиз, республикадин Кьилин къарардалди, 100 агъзур манатдин кьадарда авай пулунин сертификатар багъишна.
«Лезги газет»
