2015-йисан 15-майдиз Кьурагь райондин КIирийрин хуьре вири Дагъустандин агьалияр къарсатмишай мусибатдин дуьшуьш кьиле фенай: вагьши террористри мешебеги Зейнудин Батманован чандиз къаст авунай.

Алай йисан 15-майдиз Россиядин Федерациядин Игит Зейнудин Батманован экуь къамат рикIел хкун, адан багърийрал кьил чIугун ва рагьметлудан сурал цуьквер эцигун патал КIирийрин хуьруьз республикадин меркездайни жуьреба-жуьре районрай мугьманар хтанвай. Кьурагь райондин администрациядин пресс-къуллугъди “Лезги газетдиз” хабар гайивал, абурун арада РД-дин тамарин майишатдин Комитетдин председатель Алибег Гьажиев, адан сад лагьай заместитель Велибег Ферзуллаев, Комитетдин кьилин бухгалтер Аминат Сагьидова, Комитетдин отделдин начальник Абас Рамазанова, Сулейман-Стальский райондин кьилин сад лагьай заместитель Лацис Оружев, Дербент, Сулейман-Стальский, Табасаран, Мегьа­рамдхуьруьн, Хив районрин тамарин майишатрин регьберар ва масабур авай.

Кьурагь райондин кьил Замир Азизо­вахъ галаз санал абур Россиядин Игитдин сурал фена, анал цуьквер эцигна­.

Гуьгъуьнлай КIирийрин хуьруьн спортдин школа-интернатдин гьаятда РФ-дин Игит Зейнудин Батманов рикIел хкунин Йикъаз талукьарнавай митинг кьиле фена.

Мектебдин директор Надир Тагьирова, З.Батманован уьмуьрдин рекьикай ихтилатар авуналди, мярекат ачухна.

РД-дин тамарин майишатдин Ко­митетдин председатель А.Гьажиева РД-дин Кьилин везифаяр вахтуналди та­мамарзавай Владимир Васильева Игитдикай ЧIехи Гъалибвилин йикъаз талу­кьар­навай параддал авур ихтилатар ­ри­кIел хкана. Ада Зейнудин Батманова халис жуьрэтлувал къалурайди ва ­акьалтзавай несилри гьа ихьтин кье­гьалрилай чешне къачун лазим тирди лагьана.

Замир Азизова Кьурагь район Советрин Союздин Игитралди, машгьур алимралди, генералдалди ва баркаллу маса векилралди сейли тирди къейдна.

— Абурун жергеяр мад са кьегьалдалди — Россиядин Игит Зейнудин Бат­мано­валди къалин хъхьанва. Чи ватанэгьлидиз и чIехи тIвар гуни чак виридак­ руьгь кутуна. Батмановрин хизан КIи­рийрин хуьре зи къуншидал яшамиш жезва. Абурун чIехи буба Лукьман Батманов кьве дяведин иштиракчи тир: финнрихъ галаз кьиле фейи ва Ватандин ЧIехи дявейрин. “Яру Гъед” ордендиз лайихлу хьайи ветеранди халис игит веледар тербияламишна. Зейнудин Батманован къагьриманвили и кар мад сеферда субутна, — къейдна З.Азизова.

Ада гьакIни Кьурагь райондин администрациядин, депутатрин собранидин патай мугьманриз, Батмановрин хизанриз ва вири жемятдиз сагърай лагьана.

— Зейнудин Батманов, са шакни алачиз, гележегда хейлин несилар патал чешне яз амукьда. Заз куьн адан веледрихъ гьич са кардани игьтияж тежедайдахъ инанмишариз кIанзава. Абурун къайгъу чи чIехи уьлкведи — Россияди — чIуг­­вада, — алава хъувуна З.Азизова.

Мярекатдин сергьятра аваз З.Батманован игитвиликай чпин фикирар Сулейман-Стальский райондин кьилин сад лагьай заместитель Лацис Оружева, Кьурагь райондин ветеранрин ва агъса­къалрин советдин председатель Фахру­дин Мирзоева, Кьиблепатан Дагъустанда РД-дин Муфтиятдин марифатдин отделдин кьиле авай  Шамил Омарова ва масабуру лагьана.

Россиядин Игитдин хендеда Жамиля Халидовна Батмановади вичин рагьметлу уьмуьрдин юлдашдикай, чпин хизанрикай хуш келимаяр лугьунай виридаз чухсагъул малумарна.

Эхирдай Надир Тагьирова КIирийрин хуьруьн спортдин юкьван школа-интернатдиз Россиядин Федерациядин Игит Зейнудин Лукьманович Батманован тIвар гунин месэла къарагъарна.

Гьазурайди — Агьмед Магьмудов