РД-дин здравоохраненидин министрдин гьакъиндай Дагъустан Республикадин Кьилин Указ

1. Дагъустан Республикадин Конституциядин 78-статьядин 2-пунктунал асаслу яз, РД-дин здравоохраненидин министрвиле Гьажиибрагьимов Жамалудин  Алиевич  тайинарин.
2. И Указ адал къул чIугур йикъалай къуватда гьатзава.

Дагъустан Республикадин Кьилин везифаяр вахтуналди тамамарзавай В.Васильев

Махачкъала, 2018-йисан 14-май, №56.

***

Медицинадин илимрин доктор  Жамалудин  Алиевич  Гьажиибра­гьимов  1965-йисан 15-октябрдиз Табасаран райондин Гувлиг хуьре ди­дедиз хьана. Ада Ростовдин госмединститут ва Кьиблепатан федеральный университет акьалтIарна.

Россиядин Федерациядин лайихлу духтур Ж.Гьажиибрагьимова Дондал алай Ростовда, Махачкъалада медицинадин хиле жавабдар жуьреба-жуьре къуллугъар кьилиз акъудна. 2014-йисан февралдилай ада Россиядин ФСБ-дин РД-да авай Управленидин медико-санитарный частунин начальникдин везифаяр тамамарзавай.

Алай йисан 14-майдиз, РД-дин Кьилин везифаяр вахтуналди тамамарзавай Владимир Васильеван къарардалди, РД-дин здравоохраненидин министрвиле тайинарнава.

* * *

14-майдиз Владимир Васильева Жамалудин Гьажиибрагьимов РД-дин здравоохраненидин министерстводин коллективдихъ галаз танишарна. Мярекатда РД-дин Гьукуматдин Председателдин Сад лагьай заместитель Анатолий Къарибова ва РД-дин здравоохраненидин виликан министр Танка Ибрагьимовани иштиракна.

“Виридаз чир хьун патал къейд ийин хьи, Жамалудин Алиевича гзаф итижлу уьмуьрдин рекьер атIанва. Ада Дондал алай Ростовда медицинадин рекьяй тади куьмекдин отделенида интенсивный терапиядин духтур яз, гуьгъуьнлай ФСБ-дин къурулушда кIвалахна”, — лагьа­на Владимир Васильева. Ада гьакIни цIийи министрдихъ агалкьунар хьун алхишна ва медицинадин рекьяй республикада хъсан еридинни вахтунда агакьдай куьмекдин къурулуш цIийикIа туькIуьр хъувунин игьтияж авайди къейдна.

Жамалудин Гьажиибрагьимова вичел жавабдар къуллугъ ихтибарунай республикадин кьиле авай ксариз чухсагъул лагьана ва вичин кIвалахдин рекьяй санал зегьмет чIугвадай юлдашрин патай куьмекдик умуд кутазвайди къейдна.

“Гьялна кIанзавай месэлаяр гзаф ава. Чавай вири крар кьилиз акъудиз жедайдахъ зун инанмиш я. Чакай гьар сада чпин везифаяр намуслудаказ кьилиз акъудун лап важиблу я”, — алава хъувуна цIийи министрди.

Жамалудин Гьажиибрагьимован тIварцIихъ хуш келимаяр Танка Ибрагьимовани лагьана.

Гьазурайди — Агьмед Магьмудов