Гад гьарай я, гатун са йикъа хъуьтIуьн са варз тухарда. Уьзуьмлухрани багълара, саларани маса хилера агротехникадин серенжемар кьиле тухун давамарунихъ галаз сад хьиз, алай вахтунда хуьруьн майишатдин карханайрин, КФХ-рин ва хуьрерин зегьметчийрин вилик гатун и йикъара акъвазнавай асул везифайрикай сад мал-къарадиз алафар гьазурун я. СтIал Сулейманан райондин зегьметчиярни гьа и къайгъуйра ава.
— Алай йисуз районда, санлай къачурла, 32610 тонн векъи алафар гьазурун лазим я, — лугьузва райондин хуьруьн майишатдин ва суьрсетдин управленидин начальникдин заместитель Гьамидин Абдулкъафарова. — ЦIинин йисуз виринра алаф булдаказ ава. Гьавиляй мал-къарадиз тух кьуьд патал 33-34 агъзур тонндилай тIимил тушиз алафар гьазурда. КIвалахарни план-графикда къалурнавайвал кьиле физва.
Районда малдарвилин хел вилик тухуник еке пай кутазвай “Горец” ООО-да икьван чIавалди 650 тонн сенаж гьазурнава.
Кьилдин майишатрикай “Гамзатов М.” КФХ-ди 70 гектардай, “Гайвазов Р. С. М.” КФХ-ди 100 гектардай, “Фазилов М.-Гъ.” КФХ-ди 210 гектардай, “Горец” ООО-ди 159 гектардай векьер янава.
Районда векьер уьруьшрай, чIурухъан чкайрай, багъларин жергейрин арайрай язава.
Идалайни гъейри, райондин хуьруьн майишатдин карханайрихъ 1 йисан 432 гектар ва гзаф йисарин 159 гектар векьин уьруьшарни ава.
ДаркIуш-Къазмайрин, ЦIийи Макьарин, Эминхуьруьн, Герейханован хуьрера векьер яна, туьквера кьуна саки акьалтIарнава. Гьар са гектардай юкьван гьисабдалди 3 тонн векьер кIватI хъувунва. Им эхиримжи са шумуд йисуз хъсан нетижа я.
Гуьгъуьналлаз Кьасумхуьруьн, КIварчагърин, Курхуьруьн, Агъа, Вини ва Кьулан СтIалрин, Гуьнепатан хуьрера, дагъдин зонайрани векьер ягъунин кIвалахар башламишнава.
Ягъай ва кьуранвай векьер туьквера кьунал пресс-подборщикар галай 16 трактор машгъул я.
Виликан йисарилай тафаватлу яз, цIи районда векьер дергесралди ваъ, агрегатар галай тракторралди ва бензиндин алатралди язава. Ягъай ва туьквера кьур векьер фермайрал, мал-къара алай чкайрал хутахзава, таяйра твазва. Икьван чIавалди районда 25 агъзур тонн алаф гьазурнава.
Алай вахтунда районда ири карч алай 11179 ва гъвечIи карч алай 14638 гьайван ава.
Гьамидин Абдулкъафаров инанмиш тирвал, цIи мал-къара патал алафар артухни алаз гьазурда, хъуьтIуьз алафдикай дарвал жедач.
Районда алафар гьазурунин кIвалахар хъсан тешкиллувал аваз йигин еришралди давам жезва.
Хазран Кьасумов
