СтIал Сулейманан районда кардик квай гуьгьуьллубурун (волонтеррин) дестеди районда тухузвай гзаф мярекатра, конкурсра активвилелди иштиракзавайди, и карди абурун гуьгьуьл, ашкъи, гьевес хкажзавайди заз (гьакI районэгьлийризни) са шумудра акуна. Мукьвара зун райондин волонтеррин гьерекатдин регьбер Маина Аликберовадихъ галаз гуьруьшмиш хьана, адан вилик са шумуд суал эцигна.
- Маина Надировна, заз вуна районда волонтеррин десте гьикI арадал атанатIа, рикIел хканайтIа кIанзавай. Алай вахтунда абурун кьадар гьикьван я?
— Районда волонтеррин кIвалах тешкилуникай икI лугьуз жеда. 2017-йисуз райондин образованидин вири организацийра волонтеррин дестеяр тешкилна. Абуру школайра вири жуьредин мярекатар тешкилиз куьмекар гана, чпини вири конкурсра, мярекатра иштиракиз хьана. Школайра кардик акатай вири отрядрин башчияр райондин волонтеррин отряддик кутуна. Зун волонтеррин гьерекатдин куратор я. Зи регьбервилик кваз абуру районда тухузвай вири мярекатра, конкурсра, серенжемра иштиракзава. Мисал яз, 8-Мартдиз, дидейрин, медицинадин къуллугъчийрин йикъариз волонтерар райондин центральный больницадиз физва, медработникриз мубаракзава, абуруз цуьквер, ширинлухар гузва.
Абур яшлу инсанрин патарив кIвалериз физва, кIвалин, майишатдин кIвалахра куьмекар гузва. Чна субботникарни тешкилзава.
Волонтеррин кIвалахдикай рахадайла, мадни къейд ийиз кIанзава: чи райондин 10 волонтер галаз-галаз 2 йисуз “Бессмертный полк” онлайн-къекъуьнин модераторар хьана, заз Москвадай Чухсагъулдин чар хтана. Мадни чи 6 волонтерди Вирироссиядин переписда иштиракна, “Госкъуллугъра” регистрация ийиз куьмекна. Абурузни Дагъустандин жегьилрин крарин рекьяй министерстводи чухсагъулдин чарар гана.
Волонтерри “Чун лекьер я”, “Зун лезги я” флешмобрани иштиракзава.
Райондин вири школайрани волонтеррин отрядар тешкилнава. Абурукай 15 волонтерди агьалийрин переписда иштиракна. Абуруни РД-дин жегьилрин крарин рекьяй министерстводин ва Росстатдин гьуьрметдин грамотаяр къачуна.
Мадни 2018-2021-йисара волонтерри райондин администрацияди, образованидин управлениди, спортдин, туризмдин ва жегьилрин крарай комитетди тухвай 50-дав агакьна мярекатра (“Будь здоров”, “Мы чтим ваш возраст”, “Армейский чемоданчик”, “Берегите матерей”, “Кемерово, мы с тобой”, “Теплота детей”, “Чистый двор”, “Наследники Победы”, “Георгиевская ленточка”, “Скажи наркотикам НЕТ!”, “День добра и уважения”, “Письмо солдату”, “Звонок маме”, “Ветеран”, “Подари детям солнце”, “Масочный режим”, “Спасибо медикам!”, “Помощь пожилым”) ва маса серенжемра, къелемар ва къацуз амукьдай кул-кусар цунин субботникра ва ихьтин маса мярекатра иштиракна.
- Тамам кьве йисуз давам хьайи коронавирусдин тIугъвалдин девирда, за фикирзавайвал, волонтеррин куьмек мадни екеди хьана…
— Дугъриданни, тIугъвалди вирибурук, гьа гьисабдай яз волонтеррикни, юзун-гьерекат кутуна. Азар чкIанвай вахтунда самоизоляцияда авай инсанриз недай шейэр, дарманар, сифте нубатда герек шейэр маса къачунин, абур агьалийрал агакьарунин крара волонтерри екез куьмекар гана. Зун кьиле аваз, 10 волонтерди коронавирусдик азарлу яшлу инсанриз куьмек гуз тади гьалда чирдай курсара кIелна ва сертификатар къачуна.
Коронавирусдин тIугъвалдин девирда волонтерри саки 70-дав агакьна серенжемар (“Сидим дома!”, “Масочный режим”, “Мы Вместе”, “Волонтеры против коронавируса”, “Спасибо медикам!”, “Протяни руку помощи тому, кто в ней нуждается”, “Берегите себя и своих близких”) кьиле тухвана.
ТIугъвалдин вахтунда волонтеррин дестеди райондин “Тади куьмекдин” работникризни алакьдай куьмекар гана, абурун гуьгьуьл хкаждай кIвалахар кьиле тухвана. Мадни волонтерри хуьрерин кьилериз тIимил таъмин тир хизанрив недай суьрсет авай наборар агакьарунин кIвалахдани куьмекар гана.
Авур кIвалахар-крар мадни ава. Абур волонтеррин дестеди инлай кьулухъни давамар хъийида.
Чи мухбир
