Дербентда РД-дин искусствойрин лайихлу деятель ва композитор Къагьриман Ибрагьимованни лезги шаир  Би­лал  Адилован  яратмишунрин цlийи манийрин-концерт кьиле фена.  Залдиз атанвай инсанар ихьтин мяре­кат­дихъ фадлай цIи­гел хьанвайди акун че­тин кар тушир. ГьикI лагьайтIа, икь­ван­ чIавалди бязи манидарри маса халкьарин гьавайрив кьадай гафар туь­кIуьриз лугьузвай манийрикай мил­ли­ музыкадал рикI алайбур икрагь хьанвай.

Концерт авай юкъуз Лезги театрдин зал инсанрив ацlанвай. Лезги манидин сувар кьиле тухузвайбур жегьил шаир Владик Батманов ва театрдин актриса Амалия Керимова тир.

Абуру тамашачияр Билал Ади­ло­ван­ ва Къагьриман Ибрагьимован уьмуьрдинни яратмишунрин рекьерихъ галаз танишарна. Ахпа манийрин нумраяр башламишна. Гуьгъуьнлай цIийи 31 манидикай ибарат концерт гана.

Манияр Азербайжандай атанвай лезгийрин машгьур манидарар тир Ма­гьира Шириновади, Рафэль Къачабегова, Бахтияр Саидова ва Да­гъус­тан­дин халкьдин артистар Роза Магьсумо­вадини Фаризат Зейналовади, РД-дин лайихлу артистар Руслан Пир­вер­ди­е­вани Бесхалум Гуьлме­гьа­ме­довади, РД-дин искусствойрин ла­йих­лу деятель Къагьриман Ибрагьимова, халкьдин патай чпиз еке гьуьрмет авай Седакъет Саидовади, Мая Алимутаевади ва Ислам Велиханова тамамарна.

Им манийринни дуствилин халисан сувар тир. И концертди кьве уьлкведа яшамиш жезвай ватанэгьлияр агудунин дуствилин муьгъ арадал гъана.

Къейд ийин хьи, Къагьриман Ибрагьимован ва Билал Адилован концерт лезги культурадин уьмуьрда лишанлу вакъиадиз элкъвена. ИкI тирди мярекатдикай лезги интеллигенциядин векилри лагьай гафари мад сеферда тестикьарзава.

РикIел хкин, бажарагълу кьве автордин ихьтин концерт алатай вацра Бакудани кьиле фена.

Шагьабудин Шабатов