Халкьдин шаир Фазу Алиева дидедиз хьайидалай инихъ 90 йис тамам хьу­низ­ талу­кьарнавай шад мярекат 11-июлдиз Махачкъалада, Максим Горькийдин тIварунихъ галай Урусрин драм­театрда, кьиле фена, хабар гузва ТАСС-ди.

“Къе чна Дагъустандин зурба шаирдиз ва еке крар алакьай дишегьлидин экуь къаматдиз бахшнавай мярекат кьиле тухузва. Ам Да­гъустандин милли ли­тературадин мягькем дестекрикай сад я ва ада Россиядин шииратдин тарихда экуь чин ачухна… Дагъви дишегьлидин, дидедин, ватанпересдин къаматдиз бахшнавай шиирар кIелдайла, чIехи руьгь авай назик и дишегьлиди Да­гъустандиз­ ­гьикьван гзаф ганватIа кьатIуз, гьейран жезва”, — лагьана Дагъустан Республикадин Гьукуматдин Председателдин заместитель Муслим Телякавова.

Республикадин писателрин Союздин председатель Мегьамед Агьмедован гафаралди, шаирдин яратмишунрин кье­тIен лишанар “дуьзгуьнвал, гьахъвал, къенивал” тир.

Шад мярекатдал неинки ши­ирриз кхьенвай манияр ва кьуьлер тамамарна, гьакI Ф.Алиевадикай ар­хивдин видеоярни къалурна. Театрдин фойеда мярекатдин иштиракчияр патал выставкаярни тешкилнавай. ИкI, А.Тахо-Годидин тIварунихъ га­лай Милли музейди ша­ирдин суьретрин ва важиблу вакъиайрихъ галаз алакъа­лу шикилрин выставка туь­кIуьр­навай. Расул Гьамзатован тIвару­нихъ галай Милли ктабханади адан ктабриз талукьарнавай выставка тешкилнавай.

Гьа и юкъуз Россиядин Федерациядин Советдин Председатель Валентина Матвиенкоди ва Дагъустандин Кьил Сергей Меликова Махачкъалада Фазу Алиева яшамиш хьайи кIвалерин цлал мемориалдин кьул ачухна ва адан памятникдал цуьквер эцигна.­

Фазу Алиева Хунзах райондин Гиничутль хуьре дидедиз хьана. Ада гьам урус ва гьамни хайи авар чIаларал шиирар кхьена. Да­гъус­тандин халкьдин шаир тир адан шиирар дуьньядин 68 чIалаз таржума авунва. Ам 2016-йисан 1-январдиз 84 йиса аваз кечмиш хьана.

Регина Самедова