Федерациядин Советдин Председатель Валентина Матвиенкоди Дагъустан  Республикадин  здравоохраненидин министерстводал яргъал районра фельдшервилинни акушервилин пунктар (ФАП) эцигунал ва ишлемишиз вахкунал, авачир крар авайбурай къалурун садазни герек авачирди къейд авуналди, гуьзчивал артухарун тапшурмишна.

“ФАП эцигнавайдан гьахъ-гьисаб гьикI ийиз жеда, эгер аниз яд, электрикдин экв гъанвачтIа, эгер, термометрдилай гъейри маса са затIни ана авачтIа? Ибур вуч крар я? Ихьтин ФАП-ар низ герек я?”, — лагьана Совфеддин Спикерди РД-дин Гьукуматдин членрин иштираквал аваз кьиле тухвай заседанидал.

Адан фикирдалди, республикадин здравоохраненидин министерстводиз ихьтин крарикай чир тахьана амачир ва лазим серенжемар кьабулун герек тир. “Гьинва пул тарашай, ФАП-ар тамам­вилелди эцигна акьалтIар тавунвай ­пудратчияр? Абурукай сад кьванни жавабдарвилиз чIугунвани?”, — хабар кьуна ада региондин здравоохраненидин министрдивай. “И ФАП-ар ни эцигайди я? Куь­не прокурордиз, силисдин ор­ганриз крар (эцигунар) гадарнавай, акьал­тIар тавуна тунвай а инсанар жа­гъурун патал арза ганани? Вучиз гуьзчивал икьван­ зайифди я? Ша чна не­тижаяр кьан ва къайда тван”,  — давамар­на ада.

Валентина Матвиенкоди къейд авурвал, алай аямдин технологийри ихьтин объектар фад хкаждай мумкинвал гузва, абур капитальный эцигунар тахьай­тIани жеда. “Амма абур лазим дережада тадаракламишнавайбур хьун чарасуз я”, — алава хъувуна ада. Мадни Спикерди Россияда Президентдин тапшуругъдалди “Здравоохранение” милли проект кьилиз акъудзавайдини рикIел хкана. “Государстводи чара ийизвай кьван пулар ава. Абур халкьдин такьатар я. Ша чна здравоохраненидиз харжзавай гьар са манатдикай хийир хкатдайвал, инсанри гьалар дегиш жезвайди кьатIу­дайвал ийин”, — эвер гана В.Матвиенкоди. Ада мадни алава хъувурвал, медицинадин хиле работникар бес тахьунин месэлани гьялун лазим я. Имни тайин макьсаддихъ элкъуьр­навай механизм кардик кутуналди кьилиз акъудиз жедайди къейдна.