РФ-дин премьер-министр Михаил Мишустина Дагъустанда “Къайтагъ-Дербент” водовод тухун патал 2 миллиард манат чара авунин гьакъиндай къарардал къул чIугуна. Проект уьмуьрдиз кечирмишуни Дербентда хъвадай цин кьитвал тIимилардай ва адан ери хъсанардай мумкинвал гуда, хабар гузва министррин кабинетдин сайтди.
“И имарат эцигун патал федеральный такьатар 2022-2025-йисара государстводин “Кеферпатан Кавказдин федеральный округ виликди тухун” программадин сергьятра аваз чара ийида”, — лугьузва малуматда.
Къейдзавайвал, целди таъминардай цIийи водоводдихъ 30 километрдилай артух яргъивал ва суткада 24 агъзур кубометр целди таъминардай гужлувал жеда.
Целди таъминардай цIийи тадарак туькIуьрун Дербент шегьер 2025-йисалди вири патарихъай еримлу авуниз талукь яз М.Мишустинан тапшуругъдалди гьазурнавай пландик акатзава. Санлай къачурла, пландик 85 серенжем ква. Федеральный бюджетда абур кьилиз акъудун патал 46,7 миллиард манат фикирда кьунва.
Алай йисан апрелдиз Дербентдин кьил Рустамбег Пирмегьамедова вичин Telegram-каналда хабар гайивал, “Къайтагъ-Дербент” водовод 2024-йисан эхирдалди туькIуьрна куьтягьдайвал я. Ада алава хъувурвал, идахъ галаз сад хьиз “Шурдере-Дербент” водоводдин проектни гьазурзава.
«Лезги газет»
