Зейналан буба Пирвелиев Билал Къуджаевич 1908-йисуз Ахцегь райондин Жикъискарин хуьре дидедиз хьана. Аял чIавалай къелечивилин ва ракьукай гьар жуьредин алатар туькIуьрдай пешедин иеси хьайи Билал бубади сифте хуьре, ахпа Азербайжан пата кIвалахна. Хъсан пешекар хьиз, ам капI-тIеат ийизвай касни тир.
1970-йисуз Билал бубадин хизан ва са кьадар маса инсанарни Мегьарамдхуьруьн райондин Советский хуьруьз куьч хьана. Ада вичин уьмуьрдин юлдаш Гуьлбичедихъ галаз пуд гадани кьве руш чIехи авуна, чешнелудаказ тербияламишна.
Къенин суьгьбет вич Советский хуьруьн тай тир, 9-июлдиз вичин 70 лагьай гад къаршиламишзавай Зейналакай я. Ада 4-классдалди хайи хуьре, гуьгъуьнин 4 йисуз — Мацарин юкьван школада, ахпа Мугъанда кIелна. Советрин Армияда къуллугъна хтайла, Сумгаит шегьердин химико-технологический техникумдик экечIна. Гуьгъуьнлай са йисуз анин синтетикадинни каучукдин заводда кIвалахна. Ахпа адакай Дербентдин “Электросигнал” заводда механик хьана. Комсомолдин путевкадалди ада Иркутскдин областда целлюлозадинни чарчин комбинатда зегьмет чIугуна. Гуьгъуьнлай Туьркменистандин Небит-дагъ шегьерда буругъчи хьана.
1978-йисуз Зейнала Людмила Гьуьмметовнадихъ галаз кьисметар сад авуна. Советский хуьруьн юкьван школада ада сифте электрик яз кIвалахна, алай вахтунда майишатдин рекьяй директордин заместитель я.
Зейнал Билаловичан ва Людмила Гьуьмметовнадин хизанда кьуд велед ава.ЧIехи гада Рамазана, МЭСИ-дин экономикадин факультет яру дипломдалди куьтягьна, Санкт-Петербургда кIвалахзава. Адахъ са рушни гада ава.
Зейнаба МЭСИ-дин экономикадин факультет акьалтIарна, Норильскдин алюминийдин комбинатда кIвалахзава. Адахъ кьве аял ава.
Расима, кьве рушан бубади, икьрардин бинедаллаз Калининграддин областдин Черняховск шегьерда къуллугъзава.
Рагьман Санкт-Петербург шегьерда водоканалдин сантехникадин рабочийрин бригадир я. Адан чIехи руша бажарагълу аялрин школа-гимназиядин 9-классда кIелзава. Ам школадин телевиденидин ведущийни я.
Бажарагъ, алакьунар авай жемятдикай ибарат тир чи хуьруьн чIехи пай агьалияр патарал яшамиш жезва, гьанра кIвалахзава. Абуруз хуьре яшайиш кутадай, зегьмет чIугвадай ва хуьр аваданлу ийидай шартIар, мумкинвилер авайтIа, ажеб жедай.
Сулейман Пашаев
