И экуь дуьньядал атун гьар са касдин еке бахтлувал я лугьуда. ЧIехи хьана, кIелна, пешекарвал къачуз зегьмет чIугуна, хкягъай кеспидин рекьяй баркалла къведай агалкьунар, коллективдин арада гьуьрмет, авторитет къазанмишна, акьалтзавай несилдиз чешне хьун — им генани еке бахтлувал я. Ихьтин­ инсанар лезги чилихъ гзаф ава. Абурукай сад рагьметлу къаракуьреви, Да­гъус­тандин Огни шегьердин шуьшедин заводдин директордин заместитель яз кIвалахай Рагьман Салманович Кичибегован хизанда дидедиз хьайи пуд лагьай­ велед  Кичибегов  Фаргьад  Рагьманович  я.

Ам 1972-йисуз Дагъустандин Огни шегьерда дуьньядал атана. 1987-йисуз  шегьердин 8-класс акьал­тIарай жаван Новочеркасск ше­гьер­дин эцигунардай техникумдин ­“Промышленное и гражданское строительство” отделенидик экечIна. Техникум чешнеллудаказ акьал­тIарна, жегьил пешекар мастервиле кIвалахиз ­Дагогни шегьердин ХСУ-диз (хозрас­четдин эцигунардай участок) хтана. Ина са йиса кьван кIвалахна, 1991-йисуз  Ростовдин инженервилинни эцигунрин  институтдин “Промышленный ва гражданвилин эцигунар” факультетдик экечIна.

ХСУ-да кIвалахдайла, дерин чирвилер аваз кьилин образование къачунвай   Фаргьад Рагьмановичаз карханадин  директорди вичин заместителвиле къуллугъ авун теклифзава. Эцигунардай инженерди кIвалахдив эгечIай сифте йи­къа­рилай вич кар алакьдай пешекар яз къалурна. Адан иштираквал аваз Огнида хейлин  объектар эцигна. 1996-йисуз, кIвалахдивай къерех тахьана, ада Москвадин госуниверситетдин экономикадинни информатикадин факультетда экономист-менеджервилин ре­кьяй­  чирвилер къачузва.

1998-йисуз ам Дербентда авай  Да­гъустандин кьиблепатан районрин федеральный казначействодин региондин отделенидин ахтармишунринни реви­зиядин  отделдин казначейвилин къуллугъ тамамариз ракъурзава.

И йисара отделди Кьиблепатан Да­гъустандин районрин бюджетдин организацийра тухвай кIвалахдин нетижада бюджетдин гьахъ-гьисаб тухунин рекье ахъайзавай хейлин кимивилер винел акъудна. Бюджетдихъ галаз кIва­лахзавай бухгалтерриз цIийи къанунда гьатнавай дегишвилерин гъавурда тваз ва цIийи къайдада кIвалахиз куьмекар гана.

2005-йисуз ам Дагъустан Республикада авай Федеральный Казначействодин Управленидин Мегьарамдхуьруьн райондин отделенидин начальникдин къуллугъдал тайинарзава.

Иниз атайла, отделенидин идарадал алай гьал акурла, ам са тIимил сефил хьана. Къулайсуз шартIара работникриз кIвалахдай акьван ашкъи тежедайди Ф.Кичибеговаз чизвай. КIвалах­див га­тIун­на, работникрихъ галаз таниш хьана, абурун пешекарвилин дережа чир хьайила, адаз коллектив хъсанди тирди­ акуна. Казначействодин са гьавадин куьгьне дарамат алай чкадал ада цIийи­ди эцигунин рекьер-хуьлер жагъурунин везифа, кIвалахдиз кьецI тагана, вичин хивез къачузва.

А йисара ана кьилин казначейдин къуллугъдал кIвалахай Эрик Даирович Ибрагьимова рикIел хкизвайвал, Фар­гьад Рагьмановича кIвалахал атай ­сифте йикъарилай вич истемишунардайди, гзаф кIевивалдайди, сабурлуди ва гьа са вахтунда кIвалах тамамдиз кьиле тухузвайбурун тарифдайдини яз къалурна. Ам вини дережадин пешекар тир­виляй, отделенидин кIва-лахни вилик фе­на. Ада, такьатар жа­гъур­на, хъсан къу­лайвилер авай дараматни эцигна. Анин гьаятни кваз гуьзел чкадиз элкъуьр­на.

Кар алакьдай пешекардиз Федеральный Казначействодин Управленидин регьберрини хъсан къимет гана. Ам 2009-йисуз Дагъустан Республикада­ авай Федеральный Казначействодин Уп­равленидин Дербент шегьердин ва райондин отделенидин начальникдин къуллугъ тамамариз ракъурзава. ЦIийи къуллугъ танишди тиртIани, чIехи жа­ваб­дарвал артух жезвай.

Фаргьад Рагьманович, ял ягъиз мукь­вал-мукьвал экскурсийриз фида. Га­тузни хъуьтIуьз шегьерда авай шама­гъаждин тама ял яда. Михьи гьавади, кIва­чи-кIвачи къекъвена галатуни, ахпа ацукьна тIебиатдин акунрал гьейранвал авуни чандиз секинвал, регьятвал гъида, гьисабзава ада.

Хуш къилихрин инсан хьиз, ам жумартлу касни я. Вичин харжийрихъ  ада шегьердин 2-нумрадин интернатда кIел­завай аялриз, абурун гуьгьуьл шадардайвал, аниматоррихъ галаз гуьруьшар тешкилзава, абурун арада конкурсар, шад мярекатар тухузва, сав­кьатар пайзава, шегьердин инсанриз, усал гьалда авай набут ксариз куьмекар гузва.

Халкьди лугьудайвал, кар вилик ­тухузвайдаз, кIвалах алакьзавайдаз халкьдин арада гьуьрметни жеда, къиметни. Фаргьад Рагьманович РД-дин Фе­де­ральный Казначестводин Уп­равленидин патай  шагьабрин сагьиб я. Экономикадин рекье къазанмишнавай агалкьунрай ва яргъал йисара гьа­къисагъ зегьмет чIугунай адаз “РД-дин лайихлу экономист” лагьай гьуьрметдин тIвар, Россия­дин финансрин мини­с­терстводин “Финансрин рекьяй отличник” лагьай хурудал алкIурдай знак ­ганва.

Фаргьад Рагьманович туькIвей хизандин кьилни я. Уьмуьрдин юлдаш ­Нарима Изафудиновнадихъ галаз санал ада веледриз хъсан тербия гана, кьве кьегьал хва чIехи авунва. Нарима Иза­фу­диновна камаллу дишегьли я, ада “Промстройбанкда” бухгалтервиле кIва­лах­на, гила кIвалин майишат кьиле тухузва.­

ЧIехи хва Сейфулла Фаргьадовича Россиядин халкьарин дуствилин университет акьалтIарна, шегьерда судьядин куьмекчи яз кIвалахзава.

ЧIехи бубадин тIвар эхцигнавай гъве­чIи хва Рагьмана Россиядин технологический университетдин 2-курсуна кIел­зава.

16-июндиз Фаргьад Рагьмановича вичин 50 йисан юбилей къаршила­мишна. Хайи югъ мубаракрай, квехъ чандин сагъвал, кIвалахда еке агалкьу­нар, хизанда хушбахтвал хьун чи мурад я.

Къагьриман Ибрагьимов