Куь ихтиярар

Яшайишдин пособийрин кьадаррикай малуматар

РД-дин зегьметдин ва яшайишдин рекьяй вилик фи­нин министерстводин пресс-къуллугъди ведомст­водин Телеграмм-каналда алай йисан 1-июлдин делилралди Дагъустанда яшайишдин рекьяй государст­води чара ийизвай пособийрин кьадарар гьихьтинбур ятIа раижна:

— гьар вацра аялдиз гузвай пособие — 223 манат;

— тек дидейрин аялриз — 446 манат;

— армияда эвер гуналди (по призыву) къуллугъзавайбурун аялриз — 334 манат;

—  алиментар гуникай кьил къакъудзавай диде-бубайрин аялриз — 334 манат;

—  вад ва адалай виниз аялар хьайи хизанриз са сеферда гузвай пособие — 20 000 манат;

—  санал кьве аял хьайила — 20 000 манат;

— хизанда пуд ва адалай гзаф аялар хьайила —     100 000 манат;

— хизанда 10 лагьай ва адалай гуьгъуьниз гьар са аял хьайила — 300 000 манат;

— тIимил къазанжияр къвезвай, гзаф аялар чIехи жезвай хизанрай 1-классдиз физвай аялриз са сеферда гузвай пособие — 2 318 манат;

— 3-7 йисарин яшара авай аялриз гьар вацра гузвай пособие — 6 324,50 манат, 9 486,75 манат, 12 649 манат.

ЦIийи къанундин мумкинвилер

Мукьвара Госдумада кьиле фейи пленарный заседанидал анин председатель Вячеслав Володина хабар гайивал, алай вахтунда уьлкведа государстводин “Хизандин ипотека” программадин сергьятра аваз 2019-йисан 1-январдилай 2022-йисан 31-декабрдалди пуд лагьай ва адалай гзаф аялар хьайи хизанриз 450 агъзур манатдин кьадарда аваз пулдин пособие гузва. Хизанривай и такьатрикай яшайишдин кредитрин рекьяй авай буржар вахкунин карда менфят къачуз жеда.

Тежрибади къалурайвал, вири дуьшуьшра куьмекдин и серенжемдикай хийир къачуз жезвачир. Мисал яз, кредитрин, ипотекадин куьмекдалди маса къачунвай кIвалин иесийрин (собственник) жергеда, диде-буба­дилай гъейри, абурун веледни авай чIавуз банкари ихьтин хизанривай государстводин программадин сергьятра аваз кредитар вахкун патал чара ийизвай пулдин та­­кьатар кьабулзавачир. Малум тирвал, дидевилин капи­талдин куьмекдалди кIвалер маса къачузвай чIавуз къанундалди аялризни тайин тир паяр чара авун шартI я.

И нукьсан арадай акъудун патал Госдумада цIийи къанун кьабулнава. Адан бинедаллаз, гила государст­води чара ийизвай пособидин куьмекдалди, хизанривай­ кредитрин, ипотекадин рекьяй алай кредитар кIвалин иесийрин арада аялар аваз хьайитIани, вахкуз жеда.

Гьазурайди — Агьмед Магьмудов