Квез чидани?
— Кунгурдин муркIадин кьветI Уралда туристрин арада виридалайни машгьур чкайрикай сад я. Ам Пермдин крайда Сылва вацIун эрчIи патан къерехда, Кунгур шегьердиз мукьва экIя хьанвай Филипповка хуьруьн мулкара ава.
— ТIебиатдин надир имаратдин яргъивилел 5700 метр ала. Туристривай анжах 1500 метрдиз кьван физ жезва. Амай паюна гьелелиг инсанривай физ жедай рекьер туькIуьрнавач.
— Кунгурдин кьветIе 60 вирни 48 тIекв (епинин куьмекдалди кьветIез эвичIиз жедай чкаяр) ава. Вирера авай яд михьиди я. Абур Сылва вацIухъ галаз алакъада ава. Ина авай виридалайни еке вирин деринвили 3 метр тешкилзава.
— КьветIе элкъвей кIалубдин — турбадиз ухшар вини кьиляй къецепатаз экъечIдай тIекв авачир ажайиб “дегьлизар” ава. Абур са кьил агалнавай тоннелриз ухшар я. Санлай къачурла, абурун кьадар 146-дав агакьзава. Виридалайни яргъидан кьакьанвилел 80 метр ала.
— КьветIе кьуьд-гад мекьи гьава (нулдилай агъуз тир температура) ава. Гьавиляй ина авай муркIарни цIразвач.
— 2011-йисуз вири дуьньядиз машгьур “Forbes” изданиди дуьньядин винел алай виридалайни ажайиб цIуд кьветI хкянай. Абурун арада Кунгурдин кьветIни авай.
Гьазурайди — Агьмед Магьмудов
