5-июлдиз РД-дин Гьукуматдин Председатель Абдулмуслим Абдулмуслимова Унцукул районда Дагъустандин терроризмдиз акси комиссиядин заседание кьиле тухвана, — хабар гузва республикадин Гьукуматдин пресс-къуллугъди.
Заседанидал премьер-министрди къейд авурвал, 2022-йисуз республикада терроризмдиз акси яз кьиле тухузвай кIвалахар разивализ жедай гьалда кьиле физва. Адан гафаралди, эхиримжи 5 йисан къене кьабулзавай серенжемрин нетижада Дагъустанда терроризмдин тах квай тахсиркарвилерин вилик пад кьаз алакьзава.
“Гьа са вахтунда къурхулувални авачиз туш. Дуьз рекьелай алатнавайбурун таъсирдик акатна, террористрин цIийи дестеяр арадал атунин хаталувални ава. И кардин гьакъиндай терроризмдин тах квай тахсиркарвилериз гьазурвал аквазвай дуьшуьшар винел акъудуни шагьидвалзава.
2022-йисан 1-июндин делилралди, ихьтин 3 тахсиркарвилин вилик пад кьуна, 2 бандит тергна ва 37 боевикни абурун терефдарар кьуна”, — хабар гана А.Абдулмуслимова.
Заседанидикай гегьеншдиз РД-дин гьукуматдин сайтдай кIелиз жеда.
«Лезги газет»
