Белоруссиядиз кIвалахдин рекьяй мугьман хьунин сергьятра аваз РД-дин Гьукуматдин Председатель Абдулмуслим Абдулмуслимов Беларусь Республикадин премьер-министрдин хуьруьн майишатдин месэлайрал машгъул заместитель Леонид Заяцахъ галаз гуьруьшмиш хьана. Идакай “Лезги газетдиз” РД-дин Гьукуматдин пресс-къуллугъди хабар гана.
Гуьруьшдин сергьятра аваз терефри агропромышленный комплексдин, хуьруьн майишатдин суьрсет гьялунин, тIебиатдин девлетар менфятлудаказ ишлемишунин ва недай суьрсетдин рекьяй хатасузвал таъминарунин хилера санал кIвалахунин ва сада-садан тежриба ишлемишунин жигьетдай авай мумкинвилер веревирдна.
“Чи рахунар тамамбур, хъсан нетижа гудайбур хьана, абурун нетижада чун кьве республикадин арада экономикадин рекьяй хъсан алакъаяр тайинарунин гьакъиндай икьрар хьана ва алай вахтунда и хиле кьиле тухудай кIвалахрин тахминан планни арадал атанва. Кьилди къачуртIа, чна некIедикай суьрсет гьазурунин рекье алакъаяр гегьеншарда ва мукьвал вахтунда Дагъустанда гьасилзавай сар Беларусь Республикадиз маса гуз башламишда”, — лагьана А.Абдулмуслимова.
Къейд авурвал, 2020-йисуз Дагъустандин карханайри Беларусь Республикадиз 500 тонн сар рекье тунай. Эгер сар маса гунин кIвалах гуьнгуьна хтуртIа, хипехъанвилин хилез виликди фин патал цIийи мумкинвилер ачух жеда ва республикада кардик квай хуьруьн майишатдин кооперативривай республикадин хуьрерин чкайра лапагрин сар маса къачудай пунктар ачухун тешкилиз жеда.
Чи мухбир
