Дагъустандин Кьил Сергей Меликова Мегьарамдхуьруьн районда совещание кьиле тухвана, хабар гузва региондин пресс-къуллугъдин руководителди. Ана гьакIни гьукуматдин вице-премьер Ризван Гъазимегьамедова, Дагъустандин таможнядин начальник Сергей Троцкоди, федеральный къуллугърин ва тешкилатрин векилри иштиракна.
Совещанидал вилик эцигнавай асул месэла Россиядин Федерациядин государстводин сергьятдилай автомашинра аваз ахъайдай “Ярагъ-Къазмаяр” пунктунин кIвалах къайдада тунихъ галаз алакъалуди тир. Кьилди къачуртIа, совещанидин иштиракчийри таможнядин пункт цIийикIа туькIуьр хъувунин проект кьилиз акъудзавай тегьер ахтармишна. Къейд ийин, и кIвалах РФ-дин “Транспортдин къурулуш еримлу авун” госпрограммадин сергьятра аваз кьиле тухузва.
“Ярагъ-Къазмаяр” МАПП цIийикIа туькIуьр хъувунин кIвалахар технологиядин жигьетдай кьве паюниз пайнава ва ина таможнядилай ахъаюнин кардик квай къайда хвенва — къенин йикъан делилралди сергьятдилай суткада 500 автомашин (гьам пар чIугвадай, гьамни пассажирар тухудай) ахъайзава.
КIвалахар алай йисан эхирдалди кьилиз акъудун пландик кутунва. Идалай кьулухъ, проектдал асаслу яз, таможнядин пунктунилай суткада 1400 автомашин ва 4000 кас ахъайдай мумкинвал жеда.
Къейд авурвал, логистикадин маршрутар ва метягь гъун-тухун патал арадал гъанвай рекьер цIийикIа туькIуьр хъувунихъ галаз алакъалу яз, Россиядин рагъакIидай патан регионрай маса уьлквейриз Дагъустан Республикадин мулкунилай транзит яз тухузвай парарин кьадар садлагьана гзаф хьанва. И карди “Ярагъ-Къазмаяр” МАПП-дал гьалтзавай парни са кьадар артухарнава.
Идахъ галаз алакъалу яз сергьятдилай элячIдай “Тагьирхуьруьн-Къазмаяр” пунктунин куьмекдалди пар тухунин кIвалах тади гьалда тешкилнава — аниз Тагьирхуьруьн-Къазмайрин хуьруьн къенез гьахь тавуна фидайвал, рекьин участок ишлемишиз вахканва.
Кьабулнавай серенжемри “Ярагъ-Къазмаяр” ПП-да сергьятдилай элячIзавай транспортдин такьатар яргъал вахтуналди кIватI хьунин вилик пад кьадай мумкинвал гана ва гьалар хъсан патахъ дегишарна.
Веревирдерин нетижада совещанидин иштиракчияр Россиядинни Азербайжандин государстводин сергьят еримлу авунихъ галаз алакъалу вири месэлаяр санал гьялунин гьакъиндай икьрар хьана.
Чи мухбир
