Июлдиз къуватда гьатдай къанунрикай, дегишвилерикай и йикъара Госдумадин Председатель ­Вячеслав Володина вичин Telegram-каналда хабар гана.

Малумарайвал, алай йисан 1-июлдилай паспорт туькIуьрунин муддат куьруь жеда. ИкI, ватандашдилай ва я МФЦ-дай МВД-дин органрив талукь документар агакьайдалай кьулухъ паспорт гьазурунин муддат кIвалахзавай вад йикъалай артух тахьун къанунламишнава.

Медицинадин рекьяй пулсуздаказ куьмек къачун патал жував ОМС-дин полис гваз хьун чарасуз яз амукьдач. Маса гафаралди лагьайтIа, медицинадин куьмек герекзавай агьалидив полис гвачиз хьайитIа, паспорт къалурайтIа жеда. И къанунни 1-июлдилай къуватда гьатда.

1-июлдилай ватандашривай чеб фейи ва я яшамиш жезвай чкада регистрация авунин кар регьятдиз кьилиз акъудиз жеда.

Биологический хатасузвилин гьакъиндай къанунда са жерге цIийивилер къуватда гьатда. Кьилди къачуртIа, биологиядин рекьяй ахтармишунар тухузвай тешкилатри чпин крарикай талукь тир органдиз хабар гун чарасуз жеда. Хабардарунин къайда РФ-дин гьукуматди тайинарда.

Беледар ва экскурсоводар патал махсус аттестация кардик акатда. Къейднавайвал, туристар жезвай чкайра беледар-таржумачияр ва экскурсоводар анжах РФ-дин ватандашар хьун чарасуз я. ЦIийи истемишунрал амал тавур беледар административный жавабдарвилиз чIугвада.

К.Ферзалиев