Зи шииррин визитка “Лезгинка” баллада, зун студент тирла, “Дагправда” газетда чап авурла, Дагъустандин писателрин Союздай Расул Гьамзатова редактор Комиссароваз гьасятда зенг авунай ва ам вуч кас я адан шиирар газетда гуз лагьанай. Редактордини жаваб хганай: “Дагправда” партиядин обкомдин орган я, литературадин — ваъ”. Ам, “Лезгинка” ансамблдиз “Гуниб” тIвар гуз кIанз, гъулгъула авай вахт тир.
Узбекистанда Хорезм вилаятда “Лязги” тIвар алай кьуьл авайди заз фадлай чида. И кардикай заз ана яшамиш жезвай къелемдин зи дустари хабар гайиди тир. Хива шегьерда, Хорезм вилаятда пара лезгияр яшамиш жезвайдини лагьанай. Абур Надир шагьдин девирда тухвай аскеррикай, бязибур шаир Сулейманан береда адахъ галаз фейибурукай я.
“Лязги” кьуьл Азияда ва гьакI маса чкайрани пара машгьур я. 2019-йисан декабрдиз лишанлу ва-къиа кьиле фена — Узбекистандин президент Шавкат Мирзиёеван тIалабуналди и кьуьл ЮНЕСКО-дик кутунва. Зун гьамиша интернетдай а кьуьлуьниз тамашзава. Мад адан тариф гьикI ийидатIа,заз гафар жагъизвач. Кьуьлдайла, бедендин гьар са чкади музыкадив кьадайвал ийизвай гьар са уюн, тегьер акурла, пара гьейран жезва. Дагъустанда авай чи ансамблдин тIаркьа-тIаракьдив хкадариз, ахпа са арада бапIахар гадариз, ийизвай кьуьлер заз гьич хуш туш. Гьич рикIиз къимиш атанач физ и йикъара Махачкъалада къалурай “Лезгинкадиз”. Зун, мад сеферда ютуб ачухна, Хорезмдин визитка тир “Лязгидиз” килигна.
Зи дуст Гуьльбогьор Юсупова Хивадин нинийрин театрдин кьилин режиссер я. “Лязги” кьуьл чи дамах, чи тарих я, чи искусстводин гуьзел ва гьайбатлу хел я”, — лугьузва ада.
Са шумуд йис идалай вилик Бакудиз Хивадай фестивалдиз гъайи нинийрин театрдин тамашадин тIварни “Хивадин Лезги” тир. Ам тамашачийриз пара хуш хьанай. Малумат акурла, Бакуда авай кьван лезгияр вири атанай. Билетар жагъун тавур гзафбур театрдин вилик гьакI амукьнай. Абурун арада зунни авай.
Мукьвара зун заз теклифнавай дустарин патав Хивадиз фида. Ана мукьувай таниш жеда чи лезгийрихъ галаз, асиррилай асирралди хвенвай “Лязги” сирлу кьуьлуьниз тамашда… За газет кIелзавайбурузни интернетдай адаз тамашун теклифзава.
Бикеханум Алибегова
