Махачкъаладин куьчейра транспортдин «акьуллу» системаяр (ИТС) кардик кутуни виле акьадай хьтин нетижайрив агакьарнава: I Петрдин ва Расул Гьамзатован проспектрин машинар ахъайдай мумкинвал 14 ва 12 процентдин артух хьанва, яни и шегьрейрай фин патал гила виликандалай тIимил вахт серф ийиз жезва. Вуч лагьай чIал я им?
Меркездин агьалийрин гьакъикъатдиз элкъвенвай шикил ам я хьи, шегьердин бязи куьчейра датIана “пробкаяр” жезва. Эгер виликдай абур и ва я маса себебрихъ (мярекатрихъ) галаз алакъалу тиртIа, гила и куьчейри “ял язавай” вахт саки аквазвач. Им лагьайтIа, машинрин кьадар артух, гьа са вахтунда куьчеяр виликдай авай гьалда амаз хьунихъ галаз алакъалу я. Кьилинди ам я хьи, кьадардилай гзаф гьерекатдик акатнавай куьчейрин кьадар къвердавай гзаф жезва.
Гьаниз килигна, Махачкъалада транспортдин гьерекатдал гуьзчивалдай, гьина гьихьтин гьалар аватIа ахтармишдай ва идакай водителар виликамаз хабардардай “акьуллу” системаяр кардик кутаз башламишнава. Идакай и йикъара “Дагъустан” РИА-дин майдандал кьиле фейи пресс-конференциядал “Урбантех” компанийрин дестедин интеграциядин проектрин департаментдин директор Игорь Канатченкоди малумарна. Адан гафаралди, ИТС-дин системаяр кардик кутуни Махачкъаладин администрациядиз гьакъикъи вахтунин къайдада аваз кьадардилай гзаф гьерекат авай, кьве куьче сад-садал гьалтзавай ва гзаф кьадар машинар кIватI хьанвай куьчеяр гуьзчивилик кутадай, ДТП-яр хьайи чкайриз тади гьалда рекье гьатдай ва общественный транспортдин кIвалахдал гуьзчивалдай мумкинвал гузва. РикIел хкин, Махачкъаладин агломерацияда ИТС кардик кутаз алатай йисан ноябрдилай башламишнай.
Игорь Канатченкоди хабар гайивал, алай вахтунда проектдин кьвед лагьай пай кьилиз акъудиз башламишнава ва ам алай йисан зулухъай тамамарда. Кьвед лагьай паюнин сергьятра аваз делилар гьялдай центрада телефонрин станция ва рекьерин гьерекат идара ийидай Центрадин ip-телефония туькIуьрнава. Техникадин и такьатри операторриз жуьреба-жуьре идарайрихъ галаз тади гьалда алакъалу жедай мумкинвал гуда.
Махачкъаладин куьчейра светофоррин кьуд объект алай аямдин истемишунрив кьадайвал туькIуьрнава. И кар патал транспортдин ва кIвачи-кIвачи къекъведайбур патал 48 светофор, 8 видеокамера, рекьерин 4 контролер ва машинрин гьерекат ахтармишдай 20 детектор тайинарнава.
— ИТС-дин гуьзчивилик квай сергьятрик Махачкъалада кьуд куьче акатзава: I Петрдин, Расул Гьамзатован, Ярагъ Мегьамедан ва Коркмасован тIварарихъ галай проспектар. Шегьердин гзаф агьалийри ИТС-дин кIвалахдин нетижайрилай, иллаки “къацу лепедин” къайдада аваз кардик квай светофоррин кIвалахдилай разивалзава, — къейдзава И.Канатченкоди.
2022-йисан октябрдалди Махачкъаладин Акушинскийдин тIварунихъ галай проспектдани светофоррин 9 объект алай аямдив кьадайвал туькIуьрда. Машинрин рулрихъ ацукьнавайбуруз и ва я маса рекье авай гьалдикай, малум хьайивал, куьчейра тайинардай электронный баннеррилай виликамаз хабар гуда.
Чи мухбир
