СтIал Сулейманан райондин пресс-къуллугъди хабар гузвайвал, райондиз Аргентинадай тир тежрибалу пешекар-тренер Хуан-Альберто Вильянуэва-Пласенсиядиз эвер ганва. ИкI, бажарагълу тренерди жаван футболистрихъ галаз кьве гьафтеда мергьяматлувилин сбор — тренировкаяр кьиле тухудайвал я…
Тахминан са цIуд йис идалай вилик Махачкъаладин “Анжидикай” вири дуьньядиз хабар хьанай — 2011-йисан январдиз машгьур меценат Сулейман Керимова команда маса къачунай. Ахпа “Анжиди” нурлу йикъар кечирмишна. Командадиз футболдин халис гъетер — Роберто Карлос, Самуэль Это,О, Жусилей, Лассана Диарра, Ласина Траоре ва масабур желбнай. Са йисалай командадиз дуьньяда еке машгьурвал авай тренеррикай тир Гус Хиддинка регьбервал ганай. Тарихдин чинриз вил вегьинихъ “себеб” авачиз туш: а чIавуз Дагъларин уьлкведин гзаф жаванрин рикIера футболистар хьунин экуь къаст-ният гьатнай. Къенин юкъузни ам зайиф хьанвач…
Винидихъ тIвар кьунвай чешмеди мадни хабар гайивал, СтIал Сулейманан райондин меценатри теклифнавай Хуан-Альберто Вильянуэва-Пласенсияди, футбол машгьурунихъ ва спортдин и жуьре вилик тухунихъ галаз сад хьиз, жаван футболистрин тежриба хкажиз, къугъуна агалкьунар къазанмишиз куьмекдай теориядин чирвилерни гузва. ИкI, 16-июндиз бажарагълу тренер Алидхуьруьн юкьван школадиз мугьман хьана. Райондин спортдин, туризмдин ва жегьилрин крарин рекьяй комитетди (директордин везифаяр тамамарзавайди — Чингиз Абдулмежидов) футболдай 1-нумрадин ДЮСШ-дин тренер Агьмедагъа Саидагьмедован иштираквални аваз тешкилнавай и серенжемда футболдал рикI алай са десте аялри футбол къугъунин, спортдин и жуьреда агалкьунар къазанмишиз куьмекдай “сирерихъ” еке ашкъи-гьевесдивди яб акална. Кьилди къачуртIа, абур тупунихъ — къугъунин кьилин “алатдихъ” галаз рафтарвал авунин ва футболист яз инсан вилик финин кьилин концепциядин гъавурда туна.
Футболдай тренировкаяр Агъа СтIалрин мини-футболдин майдандал гьар юкъуз кьве сеферда кьиле тухвана.
Рагнеда Рамалданова
