Зугьраба мектебда кIелай йисар зи рикIел хъсандиз алама — 6-7-классра за адаз урус чIаланни литературадин тарсар ганай. Аялрин арада ам дерин чирвилералди, жемиятдин хийирлу крара активный хьуналди тафаватлу тир. ЧIехи-гъвечIи чидай, зайифдаз куьмек гудай, вичик тахсир квайла, ада багъишламишун тIалабдай. Мектебдин йисар акуна-такуна акъатна.
Шайдаев Зугьраба 1955-йисан 30-мартдиз дидедиз хьана. Хайи Курхуьруьн юкьван мектеб 1973-йисуз агалкьунралди куьтягьна. Майишатда са тIимил вахтунда кIвалахайдалай ва армияда къуллугъ авурдалай кьулухъ 1976-йисуз ам Санкт-Петербургдиз физва. Гьеле мектебда кIелдайла, ада вичихъ экономист хьунин фикир авайдакай лагьанай. И къастуналлаз ада Санкт-Петербургдин госуниверситетдиз документар вугузва. Агалкьунралди имтигьанар вахкай адакай студент жезва. Азад вахт ада библиотекайра алава литература кIелиз акъуддай. Университетда хъсандиз кIелни ийиз, общественный тапшуругъарни тамамариз хьайивиляй Шайдаеван тIвар еке коллективда магьшур хьана.
Университет дерин чирвилер аваз куьтягьай 1982-йисуз Зугьраб Шайдаеваз шегьердин Горный институтдиз кIвалахал теклифзава. Гьа са вахтунда ам илимдин кIвалахдални машгъул жезва. Ам шахматрални устаддиз къугъвадай, шегьерда тешкилиз хьайи акъажунрани иштиракиз, приздин чкаяр кьадай. Хуьруьз хтайла, мехъерарна, юлдашни галаз Санкт-Петербургдиз хъфена. Ина Хо Ши Минан проспектда 14-мертебадай адаз кIвалерни гана.
Шайдаев Зугьрабан ва адан юлдаш Назира муаллимдин хизанда кьве веледдиз тербия гана. Чирвилерин къиметлувилин гъавурда авай абур кьведни кьилин образование къачунвай пешекарар я.
Жегьил экономист Зугьраб Шайдаев пиво гьазурзавай «Балтика» заводдин финансрин отделдин начальниквилин къуллугъдал хутахна. Кьве вацралай, 1991-йисуз, адаз мукьвара тешкилнавай “Коломяги-ретро” ЗАО-дин финансрин директорвилин къуллугъ теклифзава. Пуд йис алатайла, кIвалахдин гъавурда хъсандаказ гьатнавай экономист Зугьраб Турабович «Коломяги-ретро» компаниядин генеральный директор жезва. Къенин юкъузни ада и къуллугъ кьиле тухузва.
Ада эцигунрин рекьяй са жерге цIийивилер, проектар кардик кутуна ва кьилиз акъудна. ЧкIанвай хуьрерал, гадарнавай чкайрал чан хкизва. КIвалахда эцигунардай цIийи, кьезил материалар гегьеншдиз ишлемишзава. Санлай Зугьраб Шайдаеван гуьзчивилик кваз 75000 кв. метрдилай артух яшайишдин кIвалер эцигна вахканва.
Гатун вахтунда Зугьраб Шайдаев хуьруьз хквезва, герек чкайриз, мектебрин ремонтриз куьмекар гузва, рекьер туькIуьр хъувунин карда иштиракзава. Месела, 1-нумрадин мектебдиз ада дакIарар, ракIарар дегишарун патал 300 агъзур манат багъишна. Агъа СтIалдал, Сулейманан музейдин вилик эцигнавай шаирдин памятникни Зугьраб Турабовича вичин харжидалди Санкт-Петербургда гьазурна, хкана.
Районэгьлийри, ван хьайи масабуруни адаз чухсагъул лугьузва. Зугьраб Турабович рикI михьи, мерд инсан я.
Уьлкве, халкь патал авунвай баркаллу кIвалахрай Зугьраб Турабович Шайдаеваз республикадин руководстводи 2022-йисан мартдиз “Дагъустан Республикадин халкьдин Игит” лагьай тIвар гана.
Чаз адахъ мягькем сагъламвал, мадни агалкьунар хьана кIанзава.
Райсудин Набиев
