Алатай йисара хьиз, цIини Мегьарамдхуьруьн райондин Советский хуьруьн юкьван школада гатун вахтунда юкъуз ял ядай ва марифатдин крарал машгъул жедай “Комета” лагерь ачухнава. Анин начальник школадин директордин кIелунинни тербиядин рекьяй заместитель Къарибов Рустам Надирович я.
И лагерда 6-июндилай 26-июндалди, къанни са юкъуз, 2-6 -классрин 55 аялди тербия къачуда ва чпин сагъламвал мягькемарда. Лагерда педагог-психологвиле Исмиханова Умуразият Шихагьмедовнади, библиотекарь Шагьгьуьсейнова Адиля Омаровнади, пионервожатияр тир Къарибова Эрика Зубаировнади, Керимова Фариза Муртузалиевнади, Султанова Ума Баламирзоевнади, ингилис чIалан тарсар гузвай муаллим Пашаева Эльмира Рафиковнади, физкультурадин тарсар гузвай муаллимрин методобъединенидин регьбер Гьажимурадов Арсен Фейзуллаевича, медсестра Шагьгьуьсейнова Фарида Гьаруновнади кIвалахзава. Аялар ина пакаман кIуьдан зуралай сятдин кьвед тамам жедалди гьар жуьре мярекатрал машгъул жезва. Абуруз кьве сеферда тIуьн гузва. Аялрин арада тIамайрай, шахматрай волейболдай, футболдай турнирар тухузва.
Шикилар чIугунай, шаиррин ва писателрин яратмишунрай, тIебиатдив къайгъударвилелди эгечIунай, Ватандин тарихдай ва маса темайрай конкурсар тешкилзава.Тербиядин рекьяй вини дережадин ахлакь къалурзавай фильмайриз килигзава. Идани аялар интернетда къалурзавай эдебсуз сегьнейрикай къерехзава.
Гьар юкъуз ина аялар патал рекьера гьерекатдин къайдаяр ва хатасузвал хуьдайвал чирун патал суьгьбетар авун пландик кутунва.
Са гафуналди, аялриз “Комета” лагерда сугъул жедай вахт авач.
Сулейман Пашаев
