И мукьвара СтIал Сулейманан райондин 1-нумрадин ДЮСШ-дин спортзалда, Россиядин Игит Радим Халикьов рикIера хуьнин лишан яз, волейболдай районрин уртах XVII турнир кьиле фена. Ам ачухуниз талукьарнавай мярекат Кьулан СтIалрин Радим Халикьован тIварунихъ галай юкьван школада хьана. Мярекатдин иштиракчийри Игитдин гуьмбетдал цуьквер эцигна, са декьикьада кисна акъвазуналди, Радим Халикьован экуь къамат рикIел хкана.

Райондин 1-нумрадин ДЮСШ-дин куьмекни галаз спортдин, туризмдин ва жегьилрин крарай комитетди тешкилнавай турнирда СтIал Сулейманан, Хив ва Ахцегь районрин командайри иштиракна.

Къизгъиндаказ кьиле фейи акъажунра Курхуьруьн команда 1-чкадиз лайихлу хьана. 2, 3 ва 4-чкаяр АрхитIрин (Хив район), Агъа СтIалрин хуьрерин ва Ахцегь райондин командайри кьуна. Абуруз медалар, грамотаяр ва пулдин пишкешар гана.

Хазран Кьасумов