Россиядин йикъан вилик Махачкъалада Дагъустандин аграрный госуниверситетдин (ДагГАУ) стадиондал футболдин милли лигадин (НФЛ) Кубок патал финалда республикадин виридалайни викIегь ва еке агалкьунар къазанмишиз алакьнавай кьве команда — “Куьре” (СтIал Сулейманан район) ва “Казбек” (Казбек район) “гуьруьшмиш хьана”.
Къизгъиндаказ кьиле фейи къугъунин нетижада “Куьре” командади гъалибвал ва Милли Кубок къазанмишна. Къейд авун лазим я хьи, тарихда сад лагьай сефер яз и райондин командадикай Дагъустандин НФЛ-дин Кубокдин сагьиб хьана.
***
Финалдин къугъун башламишдалди вилик, 12-июндиз, Россиядин йикъаз талукьарна, “Сад тир Россиядин Жегьил Гвардия” Вирироссиядин общественный организациядин (ВОО) Дагъустандин региондин отделениди (ДРО) ва Дагъустандин Милли футболдин Лигади ватанпересвилин флешмобни кьиле тухвана. ИкI, ДагГАУ-дин стадиондал уьлкведин Гимндин сесерик кваз вичихъ 1000 квадратный метрдилай виниз екевал авай пайдах ачухна.
“Сад тир Россиядин Жегьил Гвардия” ВОО-дин ДРО-дин регьбер Сергей Никитинан гафаралди, Россиядин йикъан сергьятра аваз ватанпересвилин серенжемар кьиле тухун адет хьанвай кар я. Нубатдин сеферда ихьтин серенжем кьиле тухуналди, абуру вири россиявийриз сувар тебрикна ва уьлкведин къуватлувал садвал тирди, ихьтин мярекатрихъ, сифте нубатда, жегьилар патал еке метлеб авайди, уьлкведин яржарихъ — Пайдахдихъ ва Гербдихъ — ватанпересвилин руьгьдаллаз тербияламишунин карда еке къуват авайди къейдна.
Дагъустандин НФЛ-дин председатель Вайланмат Вайланматова финал Россиядин югъ къейддалди вилик тешкилунни дуьшуьшдин кар туширди, футболдал рикI алайбуру ва къугъун тешкилайбуру, гьакIни вири иштиракчийри пайдах ачухунин серенжемдик еке ашкъидивди чпин пайни кутурди алава хъувуна.
Камилла Мегьтиханова, ДГУ-дин студентка
