Россия хкязава
Украинадин президент В.Зеленскийди “ZDF” изданидиз гайи интервьюда Германиядин канцлер О.Шольц критика авуна.
“Шольца ва адан гьукуматди са тайин къарар кьабулрай: Украинадихъни Россиядихъ галаз авай алакъайра барабарвал хуьнин алахъунар акъвазарун герек я”, — лагьана Зеленскийди.
“Новости” РИА-ди хабар гузвайвал, немсерин “ZDF” изданидин кIелчийри Украинадин президент В.Зеленскийдин гафар гьахъсузбур яз гьисабзава.
“И иви хъвадай залумди чун, немсер, эхирни секиндиз тун лазим я. Адахъ авай хьтин ягьсузвал Германиядихъ авач. Уьлкведиз герек затIар чна Россиядай къачузва. Вучиз Германиядин халкьди еримлу хьуникай, абадвиликай кьил къакъудда? Чна Россия хкязава”, — кхьенва са кIелчиди.
“Россиядихъ газдин, урандин ва нафтIадин еке запасар ава, дуьньяда гьасилзавай техилдин 19,67 процент и уьлкведал ацалтзава”, — кхьенва маса агьалиди.
Интернетдин сайтда чпин баянар гайибурукай сада Зеленскийдин бахтуни гъанач лагьанва. “Чаз Россия кIанзава. ЕС-диз коррупцияди агъавалзавай мад са государство блокдик экечIна кIанзавач”, — алава хъувуна немсди. Зеленскийдин истемишунар ван хьайила, изданидин кIелчияр тажуб хьанва.
Зеленскийдин офисдин кьилин меслятчи Подоляка малумарнавайвал, са жерге уьлквейри Украинадиз гуя уьлкве магълуб хьун патал яракьар гузва. “Чун магълуб хьун герек яз гьисабзаватIа, ачухдаказ лагь”, — лагьанва Подоляка. Ада алава хъувунвайвал, бязи уьлквеяр, гьа жергедай яз Франция, Германия, “дяведикай чуьнуьх жезва”.
Къейд ийин, Россияди Донбасс хуьнин макьсаддалди военный махсус серенжем кьиле тухузвайвиляй США-ди ва НАТО-ди Украина яракьралди ацIурзава. Гьа са вахтунда Киевдин гьукумдарри яракьар бес тежезвайдакай ва яваш еришралди агакьарзавайдакай шикаятар ийизва. Россиядин терефди са шумудра малумарайвал, Украинадиз яракьрин жигьетдай куьмекар гуни къалмакъал мадни яргъал вегьеда. Яракьар ракъурзавай улакьар лагьайтIа, Россиядин армияди тергда.
15-июндиз РФ-дин оборонадин министерстводи малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 203 самолет ва 131 вертолет, зенитный ракетайрин 339 комплекс, пилот галачиз лув гудай 1211 аппарат, 3558 танк ва дяведин маса машинар, РСЗО-дин 524 установка, артиллериядин ва маса 1958 яракь, дяведин суьрсет, военный махсус 3623 автомобиль тергна.
Киевдин тIалабун
14-июндиз РФ-дин оборонадин министерстводи малумарайвал, Украинадин терефди “Азот” заводдай ислягь агьалияр ахкъудун патал гуманитарный дегьлиз тешкилун тIалабнава.
13-июндиз Киевдин гьукумдаррин тапшуругъдалди Северский Донецдилай Лисичанскдихъ тухузвай эхиримжи муьгъ хъиткьинайвиляй агьалияр хатасуз чкадиз ахкъудунин месэла кьилиз акъудиз хьун мумкин туш, малумарна министерстводи.
Россиядин аскерри 15-июндин экуьнин 8-далай нянин 8-далди “Азотдай” ислягь агьалияр кеферпатахъ (ЛНР-дин Сватоводиз) тухудай гуманитарный дегьлиз тешкилиз гьазур тирдакай виликамаз хабар ганай.
Оборонадин министерстводи “Азот” заводда авай боевикриз ва пулунихъ кьунвай къецепатан аскерриз женгинин гьерекатар акъвазарун, абуру ана кьунвай ислягь агьалияр ахъай хъувун ва яракьар гадарна, табий хьун теклифна. Есиррихъ галаз рафтарвал авунин вири къайдайрал амал авуналди, сагъламвал хуьнин заминвал хиве кьуна. Россиядин аскерар идалай вилик Мариуполда муьтIуьгъ хьайи есирривни инсанвилелди эгечIна.
Къалабулух акатнава
Америкадин чиновникар Украинадиз куьмек патал чара авунвай такьатар гьарамзадавилелди чуьнуьхуниз ва вара-зара авуниз гьазур жезва. Идакай “Wall Street Journal” чешмеда хабар ганва.
Чешмедин делилралди, лазим тир гуьзчивал тахьайтIа, США-ди Украинадиз чара авунвай куьмекдин такьатар чуьнуьхда.
“Украинадиз гузвай еке куьмекар ва абур США-динни НАТО-дин органрин гуьзчивилик квачиз хьунин делил фикирда кьуналди, США-дин ветеранри арадал атанвай гьалар къалабулух кутазвайбур яз гьисабзава”, — лагьанва малуматда.
Экспертдин фикирдалди, ийизвай куьмек мергьяматлувилинди ятIани, чуьнуьхунар кьиле фида. Къейдзавайвал, США-ди Афгъанистандихъ галаз алакъалу гъалатIрикай тарс хкуднавач. Тади гьалда такьатар харж авурла, ахьтин крарин судурдикайни фикир авун герек я.
Коронавирус
Россияда коронавирусдин тIугъвал пайда хьайидалай инихъ 18 миллионни 382380 кас начагъ хьана. Идакай 14-июндиз ковиддихъ галаз женг тухунин оперштабдин сайтда кхьенвай.
14-июндиз вирус акатай 2797 дуьшуьш дуьздал акъудна. Адалай са йикъан вилик коронавирус себеб яз 2996 кас начагъ хьанай. Къейдзавайвал, вирус акатайбур гзафни-гзаф Санкт-Петербургда, Москвада, Москвадин областда ава.
ТIугъвалдин девирда вирусдик Россияда 380137 кас кьена.
«Лезги газет»
