Ахцегь райондин Чеперин хуьруьн къадим мискIинда 11-июндиз диндин межлис кьиле фена. Чкадин имам Умар гьажи Алиханова, Чеперин хуьруьн администрациядин кьил Багъир Забитова ва ватанперес карчи Сагьраб Ширинова кьил кутуна тешкилай и мярекатда, хуьруьнэгьлийрилай алава, теклифнавай хейлин ксарини иштиракна. Абурун арада Дербент шегьердин са мискIиндин имам Шамил гьажи Рагьманов, Мегьарамдхуьруьн райондин Бут-Къазмайрин мискIиндин имам Мегьамед-Расул гьажи Рачабов, бине Муьгъверганрин хуьряй тир алим Мегьамед-Расул гьажи Эмиржанов, Махачкъалада авай имам аш-Шафиидин тIварунихъ галай мискIиндин имамдин куьмекчи Гьуьснидин Ашуралиев, Калукрин хуьруьн имам, Ахцегь районда “Ас-салам” газетдин векил Сулейман гьажи Байрамов ва масабур авай.
Межлисдин сергьятра аваз, дуьайрин арада диндин векилри жемятдиз мусурман диндин дибдин чирвилерикай ва эдеб-ахлакьдикай ихтилатар авуна.
— Яшайишдин гьикьван кьезилвилерни къулайвилер ганва къе чаз Аллагьди: къир цанвай рекьерни машинар, кIвалера холодильникарни пек-партал чуьхуьдай машинар, къайи-чими ятар авай булахарни гьамамар, телевизорарни компьютерар ва икI мад. Ибур чи бубайривай гьич фикирдизни гъиз тахьай крар я. Абурун къадир хьана, чна Аллагьдиз гьамиша шукур гъана кIанда, — лагьана мярекатдал Гь.Ашуралиева.
М.-Р.Рачабова къейд авурвал, диндиз талукь мярекатар тешкилун Аллагьдиз хуш къведай крарикай я. Абуру халкь агудзава, жемятдин гегьенш къатарив диндикай чирвилер агакьардай мумкинвал гузва.
С.Байрамова хабар гайивал, диндин межлисар себеб яз, Аллагь-Таалади инсанри тешкилзавай чIуру межлисрай къвезвай гунагьрилай гъил къачузва. “Эхь, инсандин кьилел пара балаяр мецини нефсини гъизва. Аллагьди малаикар акьул аваз, нефс авачиз халкьнава, гьайванар — акьул авачиз, нефс аваз. Инсанриз лагьайтIа, акьулни ава, нефсни. Нефс хвена, акьуллудаказ, диндин шартIарал амална яшамиш жез алахъзавай инсанрин дережа гьатта малаикринбурулайни вине я”, — къейдна ада.
Мярекатдал рахай маса юлдашрини диндин межлисдин кьетIенвиликай чпин фикирар лагьана. Са шумуд сятда давам хьайи и межлис адан иштиракчийриз тIямлу тIуьнар гуналди акьалтI хьана.
Дашдемир Шерифалиев
