Махачкъалада махсус кабинайрикай ибарат цIийи аттракцион пайда хьанва
12-июндиз Махачкъалада, Ленинан комсомолдин тIварунихъ галай паркуна, шегьердин цIийи аттракцион — кьакьандай гьар патаз килигдай мумкинвал гузвай чарх (колесо обозрения) ачухуниз талукьарнавай мярекат кьиле фена. Ана республикадин Гьукуматдин Председатель Абдулмуслим Абдулмуслимовани иштиракна.
Вичин рахунра премьер-министрди шегьерэгьлийриз Урусатдин югъ мубаракна, жуьреба-жуьре миллетар сад авунин карда адахъ авай важиблувал къейдна. Гуьгъуьнлай ада Дагъустандин меркезда пайда хьанвай цIийи аттракциондикай вичин фикирар лагьана:
“Шегьер патал и вакъиа рикIел аламукьдайди, лишанлуди я. Заз и проектдин автор Альберт Фидаилевич Яргьамоваз сагърай лугьуз кIанзава. Пешекарвал, къуллугъдин рекьяй вичин хивевай везифайрив жавабдарвилелди эгечIун ва хъсан маса ерияр себеб яз, Альберт Фидаилевичахъ Татарстан Республикадин эцигунрин базарда чIехи агалкьунар хьанва. Виликдай республикадин кьиле хьайибурун тIалабуналди ада вичин такьатрихъ Махачкъалада икьван гуьрчег имарат арадал гъанва. Заз гьакIни и проект хушдиз кьабулай ва ам кьилиз акъудун патал чилин мулк чара авур РД-дин Кьил Сергей Меликовазни сагърай лугьуз кIанзав”, — къейдна А.Абдулмуслимова.
Чархунин кьакьанвал 50 метрдилай гзаф я. Проект кьилиз акъудун патал 150 миллион манат пул харжна. Исятда ина 15 кас кIвалахдалди таъминарнава. Имаратдин надирвиликай рахайтIа, ам кондиционерралди таъминарнавай ва хъсандиз туькIуьрнавай 15 кабинадикай ибарат я. Ашкъи авай гьар садавай абурай 50 метрдилай кьакьандай Махачкъала шегьердиз килигиз жеда.
«Лезги газет»
